Wednesday, February 15, 2017

ಕಡಲೇ ಹಿಟ್ಟು ಮತ್ತು ಬೆಲ್ಲದ ಲಡ್ಡು

ಸಕ್ಕರೆ ಬಾಯಿಗೆ ಸಿಹಿ, ಹೊಟ್ಟೆಗೆ ವಿಷ. ಸಕ್ಕರೆಯನ್ನು ಆದಷ್ಟು ಕಡಿಮೆ ತಿನ್ನಿ.. ತಿನ್ನದೇ ಇದ್ದರೂ ನಷ್ಟವೇನಿಲ್ಲ ಎಂದೇ ಹೇಳುತ್ತಾರೆ ವೈದ್ಯರು. ಆದರೆ ಬಹುತೇಕ ಸಿಹಿ ತಿಂಡಿಗಳಿಗೆ ಸಕ್ಕರೆಯನ್ನು ಹಾಕೇ ಹಾಕುತ್ತೇವೆ. ಅದರ ಬದಲು ಬೆಲ್ಲವನ್ನು ಉಪಯೋಗಿಸಿ ಮಾಡಿದರೆ ಬಾಯಿಗೂ ರುಚಿ, ದೇಹಕ್ಕೂ ಹಿತ. ಕಡಲೇ ಹಿಟ್ಟಿನ ಲಾಡನ್ನು ಸಕ್ಕರೆ ಪಾಕದಲ್ಲಿ ಮಾಡುವುದು ಸರ್ವೇ ಸಾಮಾನ್ಯ. ಆದರೆ ಬೆಲ್ಲವನ್ನು ಬಳಸಿ ಮಾಡಿದರೂ ಬಹು ರುಚಿಯಾಗಿರುತ್ತದೆ.

ಬೇಕಾಗುವ ಸಾಮಗ್ರಿಗಳು. (ಸಾಧಾರಣ ಗಾತ್ರದ ೧೫ ಲಾಡಿಗೆ)

೧. ಕಡಲೇಹಿಟ್ಟು : ೧ ಲೋಟ
೨. ಬೆಲ್ಲ : ೧/೨ ಕಪ್ಪು (ತುಂಬಾ ನೀರಿನಂತಿದ್ದರೆ ತುಸು ಕಡಿಮೆ ಹಾಕಿ.. ನಿಮ್ಮ ಸಿಹಿಗೆ ತಕ್ಕಷ್ಟು)
೩. ಕಾಯಿತುರಿ : ೧/೨ ಕಪ್ಪು
೪. ತುಪ್ಪ - ೪ ಚಮಚ
೫. ಏಲಕ್ಕಿ ಪುಡಿ
೬. ಡ್ರೈಫ್ರುಟ್ಸ್ - ಬಾದಾಮಿ, ಗೋಡಂಬಿ, ಪಿಸ್ತಾ - ೧/೪ ಕಪ್
ಬೇಕಿದ್ದರೆ ಕಡಲೇ ಬೀಜವನ್ನು ಹುರ್ದಿಉ ತರಿ ತರಿಯಾಗಿ ಹುಡಿಮಾಡಿಟ್ಟುಕೊಂಡು, ಡ್ರೈಫ್ರೂಟ್ಸ್ ಬದಲಿಗೆ ಬಳಸಬಹುದು.

ಮಾಡುವ ವಿಧಾನ
೧. ಮೊದಲು ಕಡಲೇ ಹಿಟ್ಟಿಗೆ ತುಪ್ಪ ಬೆರಸಿ ಚೆನ್ನಾಗಿ ಘಮ್ಮೆನ್ನುವ ಪರಿಮಳ ಬರುವವರೆಗೆ, ಹಿಟ್ಟು ತುಸು ಕೆಂಪಾಗುವವರೆಗೆ ಹುರಿಯಬೇಕು. ಹುರಿದ ಮೇಲೆ ಗ್ಯಾಸ್ ಆಫ್ ಮಾಡಿ ಪಕ್ಕದಲ್ಲಿಟ್ಟುಕೊಳ್ಳಿ.

೨. ಬೆಲ್ಲಕ್ಕೆ ಕಾಯಿತುರಿ ಹಾಕಿಕೊಂಡು ಕುದಿಸಿಕೊಳ್ಳಿ. (ಪಾಕವಾಗ ಬೇಕೆಂದಿಲ್ಲ)

೩. ಕುದಿಬಂದ
ಬೆಲ್ಲಕ್ಕೆ ಏಲಕ್ಕಿ ಹುಡಿ, ಡ್ರೈಫ್ರುಟ್ಸ್ ಹುಡಿ/ಕಡಲೇ ಬೀಜದ ಹುಡಿ ಎಲ್ಲವನ್ನೂ ಹಾಕಿ ಚೆನ್ನಾಗಿ ತೊಳಸಿ, ಗ್ಯಾಸ್ ಆಫ್ ಮಾಡಿ.

೪. ಮೇಲಿನ ಮಿಶ್ರಣಕ್ಕೆ ಹುರಿದಿಟ್ಟುಕೊಂಡಿರುವ ಕಡಲೇ ಹಿಟ್ಟಿನ್ನು ಸೇರಿಸಿ ಚೆನ್ನಾಗಿ ತಿರುಗಿಸಿ, ತುಸು ಬಿಸಿ ಇರುವಾಗಲೇ ಉಂಡೆ ಕಟ್ಟಿ.
ಬೇಕಿದ್ದಲ್ಲಿ ತುಪ್ಪ ಸವರಿದ ಬಟ್ಟಲಿಗೆ ಹೊಯ್ದು, ಕೊಯ್ದು ಹಲ್ವದಂತೆಯೂ ತಿನ್ನಬಹುದು.

~ತೇಜಸ್ವಿನಿ ಹೆಗಡೆ.

Wednesday, February 24, 2016

ತರ ತರ ವಿಧ ವಿಧ ತರಕಾರಿ ಹಶಿಗಳು..

ನಮ್ಮಲ್ಲಿ ಅಂದರೆ ಮಲೆನಾಡಿನಲ್ಲಿ ತಂಬುಳಿಯಷ್ಟೇ ಪ್ರಸಿದ್ಧ ಪ್ರಚಲಿತ ಹಶಿಗಳು. ಹಶಿಗೆ ನೀವು ಒಂದರ್ಥದಲ್ಲಿ ಸಾಲಡ್ ಅಂತಾನೋ ಇಲ್ಲಾ ಮೊಸರು ಬಜ್ಜಿ ಅಂತಾನೂ ಕರೆಯಬಹುದು. (ಇನ್ಯಾವ್ಯಾವ ಹೆಸರುಗಳಿವೆ ಗೊತ್ತಿಲ್ಲ.). ಇಲ್ಲಿ ನಾನು ಬಾಳೆಕಾಯಿ, ಸವತೆಕಾಯಿ, ಬದನೆಕಾಯಿ, ಬಟಾಟೆ, ಹಾಗಲಕಾಯಿ, ಮೆಂತೆಸೊಪ್ಪು, ಬೀಟ್ರೂಟು - ಈ ಕಾಯಿಪಲ್ಲೆಗಳ ಹಶಿಯ ತಯಾರಿಕಾ ವಿಧಾನವನ್ನು ಹೇಳುತ್ತಿದ್ದೇನೆ. ಇವೆಲ್ಲಾ ತಯಾರಿಸಲು ಬಲು ಸುಲಭ, ಸರಳ, ತುಂಬಾ ರುಚಿಕರ, ಆರೋಗ್ಯಕ್ಕೂ ಹಿತಕರ. ಮಾಡಲು ಬೇಕಾಗುವ ಸಾಮಗ್ರಿಗಳೂ ಅತ್ಯಲ್ಪ. ನೀವೂ ಮಾಡಿ, ತಿಂದು, ಹೇಗಿತ್ತು ಎಂದು ಹೇಳಿದರೆ ಹೇಳಿಕೊಟ್ಟ ನನಗೆ ಗುರು ದಕ್ಷಿಣೆ ಸಂದಾಯ ;)

ಹಶಿಗಳ ಪಟ್ಟಿ ತುಸು ಉದ್ದವಿರುವುದರಿಂದ ಇದನ್ನು ಭಾಗ ಒಂದು ಹಾಗೂ ಎರಡರಲ್ಲಿ ವಿಂಗಡಿಸಿದ್ದೇನೆ.

ಭಾಗ -೧

ಸೂಚನೆ: ೧) ಇಲ್ಲಿ ೪-೫ ಜನರಿಗೆ ಸಾಕಾಗುವಷ್ಟು ಪ್ರಮಾಣವನ್ನು ಕೊಡಲಾಗಿದೆ.
 ೨) ಇಲ್ಲಿ ಹೇಳಿರುವ ಎಲ್ಲಾ ಹಶಿಗಳಿಗೂ ಸ್ವಲ್ಪ (ಒಂದು ಮುಷ್ಟಿಯಷ್ಟು) ಕಾಯಿಯನ್ನು ರುಬ್ಬಿ ಹಾಕುತ್ತೇವೆ. ಆದರೆ ಅದು ಅತ್ಯವಶ್ಯಕ ಅಲ್ಲ. ತೆಂಗಿನ ಕಾಯಿ ಇಲ್ಲದೇ ಬರೀ ಮೊಸರಿನಲ್ಲಿ ಮಾಡಿದರೂ ಬಲು ರುಚಿಯಾಗಿರುತ್ತದೆ. ಕೆಲವೊಮ್ಮೆ ಮೊಸರು ಇಲ್ಲದಿದ್ದಾಗ ಬರೀ ಅರ್ಧ ಕಡಿ ಕಾಯಿಯನ್ನೇ ಬೀಸಿ ಹಾಕುವುದೂ ಇದೆ. ಸಾಮಾನ್ಯವಾಗಿ ಮೊಸರು + ತುಸು ಕಾಯಿ ಇದ್ದರೆ ಚೆನ್ನ.  ಅವರವರ ರುಚಿಗೆ ಬಿಟ್ಟಿದ್ದು. ಪ್ರಸ್ತುತ ಇಲ್ಲಿ ತೆಂಗಿನ ತುರಿ ನಾನು ಬಳಸಿಲ್ಲ. ನೀವು ಬೇಕಿದ್ದರೆ ತೆಂಗಿನ ತುರಿಯನ್ನೂ ಬೀಸಿ ಮೊಸರಿಗೆ ಮಿಶ್ರಮಾಡಬಹುದು ಇಲ್ಲಾ ಮೊಸರು ತೀರಾ ಕಡಿಮೆ ಇದ್ದಲ್ಲಿ, ತೆಂಗಿನ ತುರಿಯನ್ನೇ ಜಾಸ್ತಿ ರುಬ್ಬಿ ತೆಂಗಿನ ಹಾಲನ್ನು ಜಾಸ್ತಿ ಹಾಕಬಹುದು. ತೆಂಗಿನ ಹಾಲು ಹಾಕಿದರೆ ಬೇರೆಯೇ ರುಚಿ ಸಿಗುತ್ತದೆ. ಅದೂ ಬಲು ಚೆನ್ನಾಗಿಯೇ ಇರುತ್ತದೆ.

೧) ಬಾಳೆಕಾಯಿ ಹಶಿ


ಬೇಕಾಗುವ ಸಾಮಗ್ರಿಗಳು :-

* ಎರಡು ಮಧ್ಯಮ ಗಾತ್ರದ ಬಾಳೇಕಾಯಿ (ತೀರಾ ದೊಡ್ಡದಿದ್ದರೆ ಒಂದೇ ಸಾಕು ನಾಲ್ಕು ಜನರಿಗೆ)
* ಈರುಳ್ಳಿ - ದೊಡ್ಡದಾದರೆ ಒಂದು, ಚಿಕ್ಕದಿದ್ದಲ್ಲಿ ಎರಡು
* ರುಚಿಗೆ ತಕ್ಕಷ್ಟು ಉಪ್ಪು
* ಒಗ್ಗರಣೆಗೆ - ಎಣ್ಣೆ, ಸಾಸಿವೆ, ಉದ್ದಿನ ಬೇಳೆ, ಇಂಗು, ಹಸಿ ಮೆಣಸು ಅಥವಾ ಒಣ ಕೆಂಪು ಮೆಣಸು (ಖಾರಕ್ಕೆ ತಕ್ಕಂತೇ)
* ದಪ್ಪ ಮೊಸರು - ೪-೫ ಸೌಟು
* ತುಸು ನೀರು (ಬೇಕಿದ್ದಲ್ಲಿ)

ಮಾಡುವ ವಿಧಾನ

* ಮೊದಲು ಬಾಳೇಕಾಯಿಗಳ ಸಿಪ್ಪೆ ತೆಗೆದು ಚಿಕ್ಕದಾಗಿ ಹೆಚ್ಚಿಕೊಳ್ಳಿ
* ಅದಕ್ಕೆ ತುಸು ಉಪ್ಪು ಹಾಕಿ ಬೇಯುವಷ್ಟು ನೀರು ಸುರಿದು ಗ್ಯಾಸಿನಲ್ಲಿ ಬೇಯಿಸಿಕೊಳ್ಳಿ. ಬಾಳೆಕಾಯಿ ಬಹು ಬೇಗನೆ ಐದು ನಿಮಿಷದೊಳಗೆ ಬೆಂದು ಹೋಗುವುದು.
* ಬೆಂದ ಬಾಳೆಕಾಯಿಯನ್ನು ತಣಿಯಲು ಬಿಡಿ. ಅದು ತಣಿದ ಮೇಲೆ ಬೇಕಿದ್ದರೆ ರುಬ್ಬಿದ ಕಾಯಿ ಹಾಲು + ಮೊಸರು ಸೇರಿಸಿ. ಇಲ್ಲಾ ಹಾಗೇ ಮೊಸರನ್ನು ಹಾಕಿ. ಕಾಯಿ ಹಾಲು ಹಾಕುವುದಿದ್ದರೆ ಮೊಸರಿನ ಪ್ರಮಾಣ ಕಡಿಮೆ ಮಾಡಿ.
* ಉಪ್ಪಿನ ಹದ ನೋಡಿ, ಬೇಕಿದ್ದಲ್ಲಿ ತುಸು ಸೇರಿಸಿಕೊಳ್ಳಿ. ಈ ಮಿಶ್ರಣಕ್ಕೆ ಈರುಳ್ಳಿಗಳನ್ನು ಚಿಕ್ಕದಾಗಿ  ಹೆಚ್ಚಿ ಹಾಕಿ.
* ತದನಂತರ ಮೇಲೆ ಹೇಳಿದ ಪದಾರ್ಥಗಳಿಂದ ಒಗ್ಗರಣೆ ಕೊಟ್ಟು ಮುಚ್ಚಿಡಿ. ಖಾರ ಪ್ರಿಯರಾಗಿದ್ದರೆ ಹಸಿಮೆಣಸು ಅಥವಾ ಒಣಮೆಣಸನ್ನು ಹೆಚ್ಚು ಬಳಸಬಹುದು. ಇನ್ನು ಹಶಿ ತೀರಾ ದಪ್ಪಗಿದೆ ಎಂದೆನಿಸಿದರೆ ತುಸು ನೀರನ್ನು ಬೆರೆಸಬಹುದು.

ಬಿಸಿ ಬಿಸಿ ಅನ್ನಕ್ಕೆ ಗಟ್ಟಿಯಾಗಿ ಹಶಿಯನ್ನು ಕಲಸಿ ತಿಂದರೆ ಬೇರೇನೂ ಪದಾರ್ಥ ಬೇಕಾಗದು.

~~~~~

೨) ಸವತೆಕಾಯಿ ಹಶಿ


ಬೇಕಾಗುವ ಸಾಮಗ್ರಿಗಳು :-

* ಎರಡು ಮಧ್ಯಮ ಗಾತ್ರದ ಸವತೆಕಾಯಿ (ತೀರಾ ಚಿಕ್ಕದಿದ್ದಲ್ಲಿ ಮೂರೂ ಹಾಕಬಹುದು.)
*  ರುಚಿಗೆ ತಕ್ಕಷ್ಟು ಉಪ್ಪು
* ಒಗ್ಗರಣೆಗೆ - ಎಣ್ಣೆ, ಸಾಸಿವೆ, ಉದ್ದಿನ ಬೇಳೆ, ಇಂಗು, ಹಸಿ ಮೆಣಸು ಅಥವಾ ಒಣ ಕೆಂಪು ಮೆಣಸು (ಖಾರಕ್ಕೆ ತಕ್ಕಂತೇ), ಚಿಟಿಕೆ ಅರಿಶಿನ.
* ದಪ್ಪ ಮೊಸರು - ೪-೫ ಸೌಟು

ಮಾಡುವ ವಿಧಾನ

* ಇದು ಮತ್ತೂ ಸರಳವಾಗಿದೆ. ಮೊದಲು ಸವತೆಯಯನ್ನು ಚೆನ್ನಾಗಿ ತೊಳೆದುಕೊಳ್ಳಿ. ಸಿಪ್ಪೆ ಬೇಡದಿದ್ದರೆ, ಅದನ್ನು ಮೇಲಿಂದ ಚೂರು ತೆಗೆದುಕೊಳ್ಳಬಹುದು. ಸವತೆಯ ತುತ್ತ ತುದಿಯನ್ನು ಸ್ವಲ್ಪ ತೆಗೆದು ರುಚಿ ನೋಡಿಕೊಳ್ಳಿ. ಒಮ್ಮೊಮ್ಮೆ ಸವತೆಕಾಯಿ ಬಲು ಕಹಿಯಾಗಿರುತ್ತದೆ. ಕಹಿಯಿಲ್ಲದಿದ್ದಲ್ಲಿ ಚಿಕ್ಕದಾಗಿ ಹೆಚ್ಚಿಕೊಳ್ಳಿ.
* ಬಾಣಲೆಗೆ ಎಣ್ಣೆ ಹಾಕಿ ಮೇಲೆ ಹೇಳಿದ ಪದಾರ್ಥಗಳಿಂದ ಒಗ್ಗರಣೆ ಹಾಕಿಕೊಳ್ಳಿ.
* ಇನ್ನೇನು ಒಗ್ಗರಣೆ ಬೆಂದಿತು ಎನ್ನುವಾಗ ಚಿಟಿಕೆ ಅರಿಶಿನ ಹಾಕಿ, ಹೆಚ್ಚಿದ ಸವತೆಯನ್ನೂ ಹಾಕಿ ಚೆನ್ನಾಗಿ ಒಮ್ಮೆ ಮಿಕ್ಸ್ ಮಾಡಿ ಗ್ಯಾಸ್ ಆಫ್ ಮಾಡಿ ಬಿಡಿ. ಒಂದೊಮ್ಮೆ ನಿಮಗೋ, ನಿಮ್ಮ ಮಕ್ಕಳಿಗೋ ಶೀತವಿದ್ದಲ್ಲಿ, ತುಸು ಹೊತ್ತು ಹೆಚ್ಚು ಸವತೆಯನು ಬಿಸಿಯಲ್ಲೇ ಬಾಡಿಸಿದರೆ, ಅದರ ಶೀತದ ಅಂಶ ಹೋಗಿ ಹೆಚ್ಚು ತೊಂದರೆ ಆಗದು. ಇಲ್ಲದಿದ್ದರೆ ಹೆಚ್ಚು ಬಾಡಿಸಬೇಕೆಂದಿಲ್ಲ.
* ಒಗ್ಗರಿಸಿದ ಸವತೆ ಮಿಶ್ರಣ ಸಂಪೂರ್ಣ ತಂಪಾದ ಮೇಲೆ ಅದಕ್ಕೆ ಮೊಸರನ್ನು ಹಾಕಿ, ಉಪ್ಪು ಬೇಕಿದ್ದಲ್ಲಿ ಸೇರಿಸಿ ಊಟದ ಜೊತೆ ಸವಿಯಿರಿ. (ಇಲ್ಲೂ ಕಾಯಿ ಹಾಲು ಬೇಕಿದ್ದಲ್ಲಿ ಹಾಕಿಕೊಳ್ಳಬಹುದು.)
ಸವತೆಯಲೇ ನೀರಿನಂಶ ಧಾರಾಳವಿರುವುದರಿಂದ ಇದಕ್ಕೆ ಮತ್ತೆ ನೀರು ಸೇರಿಸುವ ಅಗತ್ಯವಿರುವುದಿಲ್ಲ.

~~~~

೩) ಬದನೆಕಾಯಿ ಹಶಿ


 ಬೇಕಾಗುವ ಸಾಮಗ್ರಿಗಳು :-

* ಎರಡು ಮಧ್ಯಮ ಗಾತ್ರದ ಬದನೆಕಾಯಿ (ತೀರಾ ದೊಡ್ಡದಿದ್ದರೆ ಒಂದೇ ಸಾಕು.. ತುಂಬಾ ಚಿಕ್ಕದಿದ್ದರೆ ನಾಲ್ಕೈದು ಬೇಕು)
* ಈರುಳ್ಳಿ - ತುಂಬಾ ದೊಡ್ಡದಾದರೆ ಒಂದು, ಚಿಕ್ಕದಿದ್ದಲ್ಲಿ ಎರಡು
* ರುಚಿಗೆ ತಕ್ಕಷ್ಟು ಉಪ್ಪು
* ಒಗ್ಗರಣೆಗೆ - ಎಣ್ಣೆ, ಸಾಸಿವೆ, ಉದ್ದಿನ ಬೇಳೆ, ಇಂಗು, ಹಸಿ ಮೆಣಸು ಅಥವಾ ಒಣ ಕೆಂಪು ಮೆಣಸು (ಖಾರಕ್ಕೆ ತಕ್ಕಂತೇ), ಚಿಟಿಗೆ ಅರಿಶಿನ
* ದಪ್ಪ ಮೊಸರು - ೪-೫ ಸೌಟು
* ತುಸು ನೀರು (ಬೇಕಿದ್ದಲ್ಲಿ)

ತಯಾರಿಸುವ ವಿಧಾನ

ಬದನೆಕಾಯಿ ಹಶಿಯನು ನಾವು ಎರಡು ವಿಧದಲ್ಲಿ ಮಾಡುತ್ತೇವೆ.

ವಿಧಾನ ೧ :-

* ಬದನೆಕಾಯಿಯನ್ನು ತೊಳೆದು, ಚಿಕ್ಕದಾಗಿ ಹೆಚ್ಚಿಟ್ಟುಕೊಳ್ಳಿ. ಹೆಚ್ಚಿಕೊಂಡ ಬದನೆಕಾಯಿಯನ್ನು ಹತ್ತು ನಿಮಿಷ ನೀರಿನಲ್ಲಿ ನೆನೆಸಿಟ್ಟಿರಿ. ಹೀಗೆ ಮಾಡುವುದರಿಂದ ಬದನೇಕಾಯಿ ಕಪ್ಪಾಗುವುದನ್ನು ತಡೆಯಬಹುದು ಮತ್ತು ಅದರ ಚೊಗರಿನ ರುಚಿಯೂ ಮಾಯವಾಗುವುದು.
* ನೀರಿನಲ್ಲಿ ನೆನೆಸಿಟ್ಟಿ ಬದನೆ ಚೂರುಗಳನ್ನು ಹಿಂಡಿ ತೆಗೆದು ಮತ್ತೊಂದು ಪಾತ್ರೆಗೆ ಹಾಕಿಕೊಳ್ಳಿ. (ನೆನೆಸಿಟ್ಟ ನೀರನ್ನು ಚೆಲ್ಲಬೇಕು.) ಅದಕ್ಕೆ ಬೇಯಲಷ್ಟೇ ಸಾಕಾಗುವಷ್ಟು ನೀರನ್ನು ಸೇರಿಸಿ, ಇದಕ್ಕೆ ತುಸು ಉಪ್ಪು ಹಾಕಿ ಗ್ಯಾಸಿನಲ್ಲಿ ಬೇಯಿಸಿಕೊಳ್ಳಿ.
* ಬೇಯಿಸಿಕೊಂಡ ಮಿಶ್ರಣವು ತಣಿದ ಮೇಲೆ ಅದಕ್ಕೆ ಕಾಯಿ ಹಾಲು (ಬೇಕಿದ್ದರೆ), ಮೊಸರು ಹಾಗೂ ಈರುಳ್ಳಿ ಹೆಚ್ಚಿ ಹಾಕಿ ಚೆನ್ನಾಗಿ ಕಲಸಿ.
* ಈ ಮಿಶ್ರಣಕ್ಕೆ ಮೇಲೆ ಹೇಳಿದ ಪದಾರ್ಥಗಳಿಂದ ಒಗ್ಗರಣೆ ಕೊಟ್ಟರೆ ರುಚಿ ಶುಚಿಯಾದ ಹಶಿ ರೆಡಿ.

ವಿಧಾನ - ೨

* ಬದನೆಕಾಯಿಯನ್ನು ಚೆನ್ನಾಗಿ ತೊಳೆದು ಹೆಚ್ಚಿಕೊಳ್ಳಿ. ಹೆಚ್ಚಿಟ್ಟಿದ್ದಕ್ಕೆ ತುಸು ಉಪ್ಪು ಹಾಗೂ ಅರಿಶಿನ ಹಾಕಿ ತುಸು ಹೊತ್ತು ಕಲಸಿಡಿ. (ನೀರು ಹಾಕಬೇಡಿ. ಉಪ್ಪು ಕರಗಿ ನೀರಾಗಿ ಚೊಗರನ್ನು ತೆಗೆಯುವುದರಿಂದ, ನೀರು ಅನಗತ್ಯ. ಅಲ್ಲದೇ ತದನಂತರ ಹುರಿಯಬೇಕಾಗಿರುವುದರಿಂದ ನೀರಿನಂಶವಿರಬಾರದು)
* ಬಾಣಲೆಗೆ ಎಣ್ಣೆ ಹಾಕಿ ಉದ್ದಿನ ಬೇಳೆ, ಸಾಸಿವೆ, ಹಸಿಮೆಣಸು ಅಥವಾ ಒಣಮೆಣಸು, ಇಂಗು ಹಾಕಿ ಒಗ್ಗರಿಸಿಕೊಳ್ಳಿ. (ಈ ಒಗ್ಗರಣೆಗೆ ಅರಿಶಿನ ಬೇಡ.. ಮೊದಲೇ ಮೇಲೆ ಹಾಕಿರುವುದರಿಂದ)
* ಒಗ್ಗರಣೆ ಬೆಂದಂತೇ ಉಪ್ಪು+ಅರಿಶಿನ ಹಾಕಿಟ್ಟ ಬದನೆಕಾಯಿ ಚೂರುಗಳನ್ನು ಹಿಂಡಿ ಒಗ್ಗರಣೆಗೆ ಹಾಕಿ ಸಣ್ಣ ಉರಿಯಲ್ಲಿ ಚೆನ್ನಾಗಿ ಹುರಿಯಿರಿ. (ಇಲ್ಲಿ ಹುರಿಯುವುದು ಇರುವುದರಿಂದ ಒಗ್ಗರಣೆಗೆ ತುಸು ಜಾಸ್ತಿ ಎಣ್ಣೆ ಬೇಕಾಗುವುದು. ನೆನಪಿರಲಿ.)
* ಬದನೆಕಾಯಿ ಚೂರುಗಳು ಒಗ್ಗರಣೆಯಲ್ಲೇ ಹುರಿದು ಬೆಂದ ಮೇಲೆ ಸಂಪೂರ್ಣ ತಣಿಯಲು ಬಿಡಿ.
* ಈ ಮಿಶ್ರಣಕ್ಕೆ ಮೊಸರು, ಈರುಳ್ಳಿ, ಬೇಕಿದ್ದರೆ ತೆಂಗಿನ ತುರಿ ಬೀಸಿದ ಕಣಕು ಹಾಕಿ, ಉಪ್ಪು ಬೇಕಿದ್ದಲ್ಲಿ ಅದನ್ನೂ ಸೇರಿಸಿ, ದಪ್ಪಗಾಗಿದ್ದಲ್ಲಿ ನೀರನ್ನೂ ಹಾಕಿಕೊಂಡು ಚೆನ್ನಾಗಿ ಕಲಸಿ. ಬಿಸಿ ಬಿಸಿ ಅನ್ನಕ್ಕೆ ಹತ್ತಕೆ (ಗಟ್ಟಿಯಾಗಿ) ಕಲಸಿ ತಿಂದರೆ ಕೈ ಚಪ್ಪರಿಸುವುದು. ಖಾರ ಬೇಕಾದವರು ತುಸು ಹೆಚ್ಚು ಮೆಣಸನ್ನು ಒಗ್ಗರಣೆಗೆ ಸೇರಿಸಿಕೊಳ್ಳಬಹುದು.

ಸೂಚನೆ :-  ಈ ಮೇಲಿನ ಎರಡು ವಿಧಾನಗಳಲ್ಲದೇ, ಇನ್ನೂ ಒಂದು ವಿಧಾನವಿದೆ. ಬದನೇಕಾಯಿ ಉದ್ದ ಗಾತ್ರದಲ್ಲಿದ್ದರೆ, ಗ್ಯಾಸಿನಲ್ಲಿಟ್ಟು ಬೇಯಿಸಿಕೊಳ್ಳುವುದು. (ಬೇಯಿಸಲಿಡುವ ಮುನ್ನ ಅದಕ್ಕೆ ನಾಲ್ಕೈದು ಕಡೆ ತೂತು ಮಾಡುವುದು. ಇದರಿಂದ ಅದು ಚೆನ್ನಾಗಿ ಬೇಯುವುದು). ಬದನೆಕಾಯಿ ಚೆನ್ನಾಗಿ ಬೆಂದ ಮೇಲೆ ಅದರ ಸಿಪ್ಪೆ ಸುಲಿದು ಸೌಟಲ್ಲಿ ಅದನ್ನು ಕೊಚ್ಚಿ, ಪೇಸ್ಟ್ ತರಹ ಮಾಡಿ, ಆ ಮಿಶ್ರಣಕ್ಕೆ ಈರುಳ್ಳಿ, ಮೊಸರು, ಉಪ್ಪು ಹಾಕಿ ಮೇಲಿನ ಒಗ್ಗರಣೆ ಸಾಮಗ್ರಿಗಳಿಂದ ಒಗ್ಗರಿಸಿದರೆ ಇದು ಬೇರೆಯೇ ಒಂದು ಟೇಸ್ಟ್ ನೀಡುವುದು. ಸುಟ್ಟ ಬದನೆಕಾಯಿ ಹಶಿ ಎಂದೇ ಪ್ರಸಿದ್ಧಿಯೂ ಇದೆ :)

ನೆನಪಿರಲಿ :- ಪ್ರತಿಯೊಂದು ಹಶಿಗೂ ಅದನ್ನು ಹುರಿದೋ ಇಲ್ಲಾ ಬೇಯಿಸಿಯೋ ಮಾಡುವಾಗ, ಅದು ಸಂಪೂರ್ಣ ತಣಿದ ವಿನಃ ಮೊಸರು+ಕಾಯಿ ಸೇರಿಸಬೇಡಿ. ಬಿಸಿ ಇರುವಾಗಲೇ ಸೇರಿಸಿದರೆ ತುಸು ಅಡ್ಡ ವಾಸನೆ ಹೊಂದಿ ಕೆಡುವ ಸಂಭವ ಹೆಚ್ಚಾಗುವುದು.

ಸರಿ.. ಈಗ ಇವಿಷ್ಟು ಹಶಿಯನ್ನು ಈ ವಾರದಲ್ಲಿ ಮಾಡಿ ತಿಂದು ತೇಗಿ, ರಿಸಲ್ಟ್ ನನಗೆ ಕೊಟ್ಟ ಮೇಲೆ ಭಾಗ -೨ ನ್ನು ರಿಲೀಸ್ ಮಾಡಲಾಗುವುದು. :)

ಚಿತ್ರಗಳ ಕೃಪೆ : ಗೂಗಲಣ್ಣ.

~ತೇಜಸ್ವಿನಿ ಹೆಗಡೆ


Tuesday, June 30, 2015

ರುಚಿಕರ ಹಾಗೂ ಆರೋಗ್ಯಕರವಾದ ಗೋಧಿ ಹಪ್ಪಳ


ಇದು ನನ್ನಮ್ಮನ ಸ್ಪೆಷಲ್ ರೆಸೆಪಿ :) ಮೈದಾ ಹಿಟ್ಟು ಯಾವುದೇ ಕಾರಣಕ್ಕೂ ಆರೋಗ್ಯಕ್ಕೆ ಒಳ್ಳೆಯದಲ್ಲ. ಈ ಹಪ್ಪಳಕ್ಕೆ ಉದ್ದೂ ಬೇಕಾಗಿಲ್ಲ. ಹಾಗಾಗಿ ತಯಾರಿಸಲೂ ಸುಲಭ, ಆರೋಗ್ಯಕ್ಕೂ ಹಿತರ, ತಿನ್ನಲೂ ಬಲು ರಿಚಿಕರವಾದ ಹಪ್ಪಳವಿದು. ಇಷ್ಟವಾದವರು, ಹಪ್ಪಳ ತಯಾರಿಸಿ ತಿಂದು ನಿಮ್ಮ ಅನುಭವವನ್ನು ಹಂಚಿಕೊಂಡರೆ ನನಗೂ ಬಲು ಸಂತಸವಾಗುವುದು :)

Copyright - Tejaswini Hegde

ಬೇಕಾಗುವ ಸಾಮಗ್ರಿಗಳು

೧) ಗೋಧಿ ಹಿಟ್ಟು - (ನಾನು ಬಳಸಿದ್ದು ಆಶೀರ್ವಾದ್ ಗೋಧಿ ಹಿಟ್ಟು.. ಲೂಸ್ ಪ್ಯಾಕೆಟ್ ಆಗಿದ್ರೆ ಏನಾದ್ರೂ ಬೆರಕೆ ಮಾಡಿರುವ ಸಾಧ್ಯತೆ ಇರುವುದರಿಂದ ಹೇಗಾಗುವುದೋ ತಿಳಿಯದು.). ೧/೨ ಕೆ.ಜಿ.
೨) ಜೀರಿಗೆ - ದೊಡ್ಡ ಚಮಚವಾದರೆ ೧ ಚಮಚ. ಟೀ ಸ್ಪೂನ್ ಆದರೆ ೨ ಚಮಚ
೩) ಓಂ ಕಾಳು - ೧/೨ ಚಮಚ.
[ಒಂದೊಮ್ಮೆ ಜೀರಿಗೆ ಇಷ್ಟ ಪಡದವರು ಕೇವಲ ಓಂ ಕಾಳು ಮಾತ್ರ ಉಪಯೋಗಿಸುವಂತಿದ್ದರೆ ದೊಡ್ಡ ಚಮಚವಾದರೆ ೧ ಚಮಚ ಇಲ್ಲಾ ಟೀ ಸ್ಪೂನ್ ಆದರೆ ೨ ಚಮಚ ಉಪಯೋಗಿಸಿ.)
೪) ಅಚ್ಚ ಖಾರದ ಪುಡಿ - ಖಾರಕ್ಕೆ ತಕ್ಕಷ್ಟು
೫) ಉಪ್ಪು- ರುಚಿಗೆ ತಕ್ಕಷ್ಟು
೭) ಸಕ್ಕರೆ (ಬೇಕಿದ್ದರ ಮಾತ್ರ) - ೧/೨-೧ ಟೀ ಸ್ಪೂನ್.
೬) ನೀರು - ಹಿಟ್ಟನ್ನು ಕಲಸುವಾಗ ಅದು ಉದ್ದಿನ ದೋಸೆ ಹಿಟ್ಟಿನ ಹದಕ್ಕೆ ಬರಬೇಕು. ಗಂಟು ಗಂಟಾಗದಂತೇ ಆ ಹದದಲ್ಲಿ ಕಲಸುವಷ್ಟು ನೀರು ಹಾಕಿಕೊಳ್ಳಿ. ಸ್ವಲ್ಪ ಸ್ವಲ್ಪ ಸೇರಿಸುತ್ತಾ ಹೋಗಬೇಕು.
೭) ಕೊಬ್ಬರಿ ಎಣ್ಣೆ ಅಥವಾ ಯಾವುದೇ ಅಡುಗೆ ಎಣ್ಣೆ - ಕೈಗಳಿಗೆ ಸವರಿಕೊಳ್ಳುವಷ್ಟು.

ಮಾಡುವ ವಿಧಾನ

* ಮೊದಲಿಗೆ ಒಂದು ಅಗಲವಾದ ಬಾಣಲೆಯಾಕಾರದ ಪಾತ್ರೆಯೊಳಗೆ ಗೋಧಿ ಹಿಟ್ಟನ್ನು ಹಾಕಿಕೊಳ್ಳಿ. ಇದಕ್ಕೆ ಖಾರದ ಪುಡಿ, ಉಪ್ಪು, ಓಂಕಾಳು, ಜೀರಿಗೆ (ಜೀರಿಗೆ ಬೇಡದವರು ಮೇಲೆ ಹೇಳಿರುವಂತೇ ಬರಿಯ ಓಂಕಾಳು ಸೇರಿಸಬಹುದು.), ಸಕ್ಕರೆ - ಇವುಗಳನ್ನೆಲ್ಲಾ ಸೇರಿಸಿ.

* ಈ ಮಿಶ್ರಣಕ್ಕೆ ಮೇಲೆ ಹೇಳಿರುವಂತೇ ಸ್ವಲ್ಪ ಸ್ವಲ್ಪವೇ ನೀರುನ್ನಾ ಸೇರಿಸುತ್ತಾ, ಗಂಟು ಗಂಟಾಗದಂತೇ ಕದಡುತ್ತಾ ಉದ್ದಿನ ದೋಸೆ ಹಿಟ್ಟಿನ ಹದಕ್ಕೆ ತನ್ನಿ.

* ಚೆನ್ನಾಗಿ ಕದಡಿರುವ ಈ ಮಿಶ್ರಣವನ್ನು ಒಂದು ಬಟ್ಟಲಿಗೆ ಹೊಯ್ದು, ಇಡ್ಲಿ ದಳ್ಳೆಯಲ್ಲಿಟ್ಟು ೨೦-೩೦ ನಿಮಿಷಗಳವರೆಗೆ ಬೇಯಿಸಿ.

* ಚೆನ್ನಾಗಿ ಬೆಂದ ಹಿಟ್ಟನ್ನು, ನಾವು ಕೈಯಾಡಿಸುವಷ್ಟು ಬಿಸಿ ಇರುವಾಗಲೇ ಸ್ವಲ್ಪ ಸ್ವಲ್ಪ ದಳ್ಳೆಯಿಂದ ತೆಗೆದು (ಒಂದೇ ಸಲ ಎಲ್ಲಾ ಹಿಟ್ಟನ್ನು ಹೊರ ತೆಗೆದಿಟ್ಟುಕೊಂಡರೆ, ಗಾಳಿಯಾಡಿ ಹಿಟ್ಟು ತಣ್ಣಗಾಗಿ, ಗಟ್ಟಿಯಾಗಿ ಬಿಡುತ್ತದೆ.) ಚೆನ್ನಾಗಿ ನಾದಿಕೊಳ್ಳಬೇಕು.

Copyright - Tejaswini Hegde
* ಕೈಗಳಿಗೆ ಸ್ವಲ್ಪ ಕೊಬ್ಬರಿ ಎಣ್ಣೆಯನ್ನೋ ಇಲ್ಲಾ ನೀವು ಬಳಸುವ ಯಾವುದೇ ಅಡುಗೆಯ ಎಣ್ಣೆಯನ್ನೂ ತುಸು ಸವರಿಕೊಳ್ಳಿ. ನಾದಿದ ಹಿಟ್ಟನ್ನು ಪುರಿ/ಚಪಾತಿ ಹಿಟ್ಟಿನ ಉಂಡೆಯಂತೇ ಸಣ್ಣ ಉಂಡೆಗಳನ್ನಾಗಿಸಿ, ಪುರಿಗೆ ಲಟ್ಟಿಸುವಷ್ಟು ದೊಡ್ಡದಾಗಿ ಲಟ್ಟಿಸಿ. (ಚಿತ್ರದಲ್ಲಿ ತೋರಿಸಿದಷ್ಟು ಗಾತ್ರದಲ್ಲಿ)

* ಈ ಲಟ್ಟಿಸಿದ ಹಪ್ಪಳಗಳನ್ನು ೨-೩ ಬಿಸಿಲಿಗೆ ಇಟ್ಟರೆ ಸಾಕಾಗುವುದು. ಚೆನ್ನಾದ ಬಿಸಿಲು ೨ ಸಿಕ್ಕರೂ ಸಾಕಾಗುತ್ತದೆ. ಮೊದಲ ದಿನವೇ ಅದು ಗರಿ ಗರಿಯಾಗಿ ಬಿಟ್ಟಿರುತ್ತದೆ (ಬಿಸಿಲು ೨-೩ ಗಂಟೆ ಸಿಕ್ಕರೂ..!).

* ಗರಿ ಗರಿಯಾದ ಹಪ್ಪಳಗಳನ್ನು ಗಾಳಿಯಾಡದ ಡಬ್ಬದಲ್ಲಿ ತುಂಬಿಡಿ. ಮಳೆಗಾಲದಲ್ಲೋ ಇಲ್ಲಾ ಚಳಿಗಾಲದಲ್ಲೋ ಒಂದೊಂದೇ ಹಪ್ಪಳಗಳನ್ನು ಸುಟ್ಟು ಇಲ್ಲಾ ಕರಿದು ತಿಂದರೆ ಅದರ ಮಜವೇ ಬೇರೆ.

~ತೇಜಸ್ವಿನಿ ಹೆಗಡೆ.

Friday, October 04, 2013

ಬಟಾಟೆ ಖಾರಾ ತಾಳಿ

ಒಮ್ಮೊಮ್ಮೆ ಏನೂ ಮಾಡ್ಕೊಳೋದೇ ಬೇಡ ಅನ್ಸಿಬಿಡೊತ್ತೆ.... ಸುಮ್ಮನೇ ಕೂತು ಓದೋದೋ.. ಬಟ್ಟೆ ಮಡಚೋದೋ ಮಾಡ್ತಾ ಕುಂತ್ರೆ ತಿನ್ನೋದೂ ಬ್ಯಾಡ, ತಿನಿಸು ಮಾಡೋದೂ ಬ್ಯಾಡ ಅನ್ನಿಸಿ ಬಿಡೋತ್ತೆ ಅಲ್ವಾ? ಆದ್ರೆ ಹೊಟ್ಟೆ ಅನ್ನೋದು ಇದನ್ನೆಲ್ಲಾ ಕೇಳೋದೇ ಇಲ್ಲಾ. ಆವಾಗ ಮನೇಲಿ ಮೊಸರು ಇದ್ರೆ ಅನ್ನ ಒಂದು ಮಾಡ್ಕೊಳ್ಳಿ. ಆಮೇಲೆ ಬಟಾಟೆ ಇದ್ರೆ ಅದ್ರ "ಖಾರಾ ತಾಳಿ" ಒಂದು ಮಾಡಿಕೊಂಡ್ರೆ ಊಟದಿಂದ ಏಳಬೇಕೆಂದೇ ಅನಿಸುವುದಿಲ್ಲ. ಅನ್ನ ಕೂಗಿದ್ಮೇಲೆ ನೀವು ಮಾಡೋಕೆ ಹೊರಟ್ರೆ, ವಿಸಿಲ್ ತೆಗ್ಯೋದ್ರೊಳ್ಗೆ ಖಾರಾ ತಾಳಿ ರೆಡಿ ಆಗಿರೊತ್ತೆ. :)
Courtesy : Internet

ಬಟಾಟೆ ಖಾರಾ ತಾಳಿಗೆ ಬೇಕಾಗುವ ಸಾಮಾಗ್ರಿಗಳು :

೨ ಮಧ್ಯಮ ಗಾತ್ರದ ಬಟಾಟೆ
ರವೆ - ೨ ದೊಡ್ಡ ಚಮಚ.
ಮೆಣಸಿನ ಹುಡಿ - ಖಾರಕ್ಕೆ ತಕ್ಕ
ಉಪ್ಪು - ರುಚಿಗೆ ತಕ್ಕ
ತೆಂಗಿನೆಣ್ಣೆ

ಮಾಡುವ ವಿಧಾನ

೧. ಮೊದಲು ಬಟಾಟೆಯನ್ನು ತೊಳೆದು, ಸಿಪ್ಪೆ ತೆಗೆದು ಆದಷ್ಟು ತೆಳುವಾಗಿ ತಾಳಿ ಮಾಡಿಟ್ಟುಕೊಳ್ಳಿ.
೨. ಒಂದು ಬಟ್ಟಲಿಗೆ ರವೆ, ಉಪ್ಪು, ಖಾರ ಹಾಕಿ ಮಿಶ್ರಣ ಮಾಡಿ (ನೀರು ಹಾಕದೇ...) ಹುಡಿ ಮಿಶ್ರಣದ ಉಪ್ಪು, ಖಾರ ಸರಿಯಾಗಿದೆಯೇ ಎಂದು ನೋಡಿಕೊಳ್ಳಿ.
೩. ಮಾಡಿಟ್ಟ ಬಟಾಟೆ ತಾಳಿಗಳನ್ನು ಹುಡಿಯ ಮಿಶ್ರಣಕ್ಕೆ ಹುದುಗಿಸಿ, ತಾಳಿಯ ಎರೆಡೂ ಬದಿ ಹುಡಿ ಅಂಟಿಕೊಳ್ಳುವಂತೆ ಮಾಡಿ.
೪. ದೋಸೆ ಕಾವಲಿ ಇಟ್ಟು, ಹುಡಿ ಅಂಟಿದ ಬಟಾಟೆ ತಾಳಿಗಳನ್ನು ಬಿಸಿಯಾದ ಬಂಡಿಯ ಮೇಲಿಟ್ಟು ಎರಡೂ ಬದಿ ಎರಡೆರಡು ಹನಿ ಎಣ್ಣೆ ಬಿಟ್ಟು, ಹಾಗೇ ಮುಚ್ಚಿ ಬೇಯಿಸಿ.

ಬಿಸಿ ಬಿಸಿ ಖಾರ ತಾಳಿಯನ್ನು ಮೊಸರಿನೊಂದಿಗೆ ಸವಿಯುವ ಮಜ, ತಿಂದವರಿಗೆ ಮಾತ್ರ ಗೊತ್ತು. ಉಪ್ಪು, ಖಾರದ ಜೊತೆ ರವೆಯ ರುಚಿಯ ಸ್ವಾದವೇ ಬೇರೆ. ಬೆಂದ ನಂತರ ಖಾರಾ ತಾಳಿಗಳ ಘಮ್ಮನೆ ಕಂಪು ಹಸಿವಿಲ್ಲದವರ ಹಸಿವನ್ನೂ ಬಡಿದೆಬ್ಬಿಸಿದ್ದರೆ ಹೇಳಿ.

ಮಾಡಿ ನೋಡಿ... ನೋಡಿ ಹೇಳಿ :)

-ತೇಜಸ್ವಿನಿ.

Wednesday, August 21, 2013

ರುಚಿಕರ ಮತ್ತು ಆರೋಗ್ಯಕರ ಗೋಧಿ ಹಲ್ವ

ಗೋಧಿ ಹಲ್ವ ಆರೋಗ್ಯಕ್ಕೂ ಒಳ್ಳೆಯದು. ಬಾಯಿಗೂ ರುಚಿಕರ. ಮಾಡಲೂ ಸುಲಭ ಸರಳ. ಥಟ್ ಎಂದು ೧೫ ನಿಮಿಷದೊಳಗೆ ಒಂದು ಲೋಟ ಗೋಧಿ ಹಿಟ್ಟಿನ ಹಲ್ವವನ್ನು ತಯಾರಿಸಬಹುದು. ಬಿಲ್ಲೆಯಾಕಾರದಲ್ಲಿ ಕೊರೆದಿಟ್ಟುಕೊಂಡು, ಗಾಳಿಯಾಡದ ಡಬ್ಬದಲ್ಲಿಟ್ಟರೆ ೫-೬ ದಿನಗಳವರೆಗೂ ಚೆನ್ನಾಗಿರುತ್ತದೆ. ಇದನ್ನು ತಯಾರಿಸಲು ಬೇಕಾದ ಸಾಮಗ್ರಿಗಳೂ ಅತ್ಯಲ್ಪ. ಪಾಕವೊಂದು ಸರಿಯಾಗಿ ಆದರೆ ಮತ್ತೆಲ್ಲಾ ಅತಿ ಸುಲಭ.

ಬೇಕಾಗುವ ಸಾಮಗ್ರಿಗಳು 
Copy Right - Tejaswini 


ಗೋಧಿ ಹಿಟ್ಟು - ೧ ಲೋಟ
ತುಪ್ಪ - ೧/೪ ಲೋಟ
ಸಕ್ಕರೆ - ೧ ಲೋಟ
ನೀರು - ೧/೪ ಲೋಟ
ಏಲಕ್ಕಿ - ೬-೭ (ಪುಡಿ ಮಾಡಿಟ್ಟುಕೊಳ್ಳಬೇಕು.)
ಗೋಡಂಬಿ, ಧ್ರಾಕ್ಷಿ - ಬೇಕಾದ್ದಷ್ಟು. [ಹುರಿದೋ ಇಲ್ಲಾ ಹಾಗೆಯೋ ಹಾಕಿಕೊಳ್ಳಬಹುದು. ]
ಲವಂಗ - ೨ (ಇದನ್ನೂ ಏಲಕ್ಕಿಯ ಜೊತೆ ಪುಡಿಮಾಡಿಟ್ಟುಕೊಳ್ಳಬೇಕು.)

ಮಾಡುವ ವಿಧಾನ

* ಮೊದಲು ಗೋಧಿ ಹಿಟ್ಟನ್ನು ತುಪ್ಪದಲ್ಲಿ ಘಮ್ಮೆನ್ನುವಷ್ಟು ಚೆನ್ನಾಗಿ ಹುರಿದಿಟ್ಟುಕೊಳ್ಳಿ.

* ಇದಕ್ಕೆ ಹುಡಿಮಾಡಿಟ್ಟುಕೊಂಡ ಲವಂಗ, ಏಲಕ್ಕಿಪುಡಿಯನ್ನು ಹಾಕಿ ಒಮ್ಮೆ ತಿರುವಿ.

* ಸಕ್ಕರೆ + ತುಸು ನೀರನ್ನು ಒಲೆಯಲ್ಲಿಟ್ಟು ಸಣ್ಣ ಉರಿಯಲ್ಲಿ ಪಾಕಕ್ಕೆ ಇಡಿ. ಸಣ್ಣ ಒಲೆಯಲ್ಲೇ ಇಡಬೇಕು.. ಇಲ್ಲದಿದ್ದರೆ ಪಾಕ ಹೆಚ್ಚಾಗಬಹುದು. ಆಗಾಗ ಕಡದುತ್ತಿದ್ದು ಒಂದು ಹಂತದಲ್ಲಿ ಸಕ್ಕರೆ ಕರಗಿ ಕುದಿಯ ತೊಡಗುತ್ತದೆ (೩-೪ ನಿಮಿಷದೊಳಗೇ). ಆಗ ಪಾಕವಾಯಿತೆಂದು ನೋಡಲು ಒಂದು ಬಟ್ಟಲಲ್ಲಿ ನೀರು ತೆಗೆದುಕೊಂಡು ಅದಕ್ಕಿ ಒಂದು ಹನಿ ಪಾಕದ ರಸವನ್ನು ಹಾಕಿ. ಹಾಕಿದ ಹನಿ ಪಾಕವಾಗಿರದಿದ್ದರೆ ನೀರಿನಲ್ಲಿ ಹರಡಿ ಹೋಗುತ್ತದೆ. ಪಾಕವಾಗಿದ್ದರೆ ನೀರಿನ ತಳ ಸೇರಿ ಮುದ್ದೆಯಾಗುತ್ತದೆ.

* ಪಾಕವಾದ ಮೇಲೇ ತಕ್ಷಣ ಒಲೆ ಆರಿಸಿ. ಪಾಕವನ್ನು ತಕ್ಷಣ ಹುರಿದ ಗೋಧಿ ಹಿಟ್ಟಿನ ಮಿಶ್ರಣಕ್ಕೆ ಸುರಿದು ಚೆನ್ನಾಗಿ ತಿರುಗಿಸಿಕೊಳ್ಳಿ. ಸರಿಯಾಗಿ ಹದವಾದ ಕೂಡಲೇ ಮೊದಲೇ ತುಪ್ಪವನ್ನು ಒರೆಸಿಟ್ಟುಕೊಂಡಿದ್ದ ಬಟ್ಟಲಿಗೆ ಹೊಯ್ದು ಚೂರಿ, ಅಥವಾ ಚಮಚದಲ್ಲಿ ಬಿಲ್ಲೆಯಾಕಾರದಲ್ಲಿ ಕೊರೆದುಕೊಳ್ಳಿ. ಆರಿದ ಮೇಲೆ ಅದನ್ನು ತೆಗೆದು ಡಬ್ಬದಲ್ಲಿ ತುಂಬಿಸಿ.

ನೆನಪಿಡಿ. 
ಗೋಡಂಬಿ ಧ್ರಾಕ್ಷಿಯನ್ನು ಮೊದಲೇ ಹುರಿದ ಮಿಶ್ರಣಕ್ಕೆ ಹಾಕಬಹುದು, ಇಲ್ಲಾ ಪಾಕವನ್ನು ಹಾಕಿ ತಿರುವುವಾಗಲೂ ಹಾಕಬಹುದು.

ಸಕ್ಕರೆ ಪಾಕವಾದ ತಕ್ಷಣ ಗೋಧಿ ಹಿಟ್ಟಿಗೆ ಹಾಕಿ ಚೆನ್ನಾಗಿ ಕಲಸಬೇಕು. ತುಸು ತಡವಾದರೂ ಪಾಕ ಗಟ್ಟಿಯಾಗಿ ಮತ್ತೆ ಕರಗಿಸಬೇಕಾಗುತ್ತದೆ!

ಒಂದೊಮ್ಮೆ ಪಾಕ ಹೆಚ್ಚಾಗಿದ್ದರೆ ಚಮಚದಲ್ಲೇ ತಿಂದು ಬಿಡಿ :) ಹೇಗೆ ತಿಂದರೂ ರುಚಿ ಮಾತ್ರ ಒಂದೇ ತರಹ ಇದ್ದಿರುತ್ತದೆ.

ಈ ತಿನಿಸನ್ನು ಮಾಡಿದರೆ, ತಿಂದು ರುಚಿಯೆನಿಸಿದರೆ ನನ್ನೊಂದಿಗೆ ಸಿಹಿಯ ರುಚಿಯನ್ನೂ ಹಂಚಿಕೊಳ್ಳಿ :)

-ತೇಜಸ್ವಿನಿ.

Wednesday, August 14, 2013

ಜಿಟಿ ಜಿಟಿ ಮಳೆಗೆ ಹಸಿ ಬಿಸಿ ಈರುಳ್ಳಿ ಹಾಗೂ ಸಾಂಬ್ರಾಣಿ ಸೊಪ್ಪಿನ ತಂಬುಳಿಗಳು....

ಇನ್ನೇನು ಮಳೆ ಧೊಪ್ಪನೆ ಬೀಳೋ ತರಹ ಕಪ್ಪುಗಟ್ಟಿದೆ....  ಹೊರ ಬೀಸುವ ಮಳೆಯ ಚಳಿಗಾಳಿಯ ಜೊತೆ ಒಳಗೆ ಸುಟಿ ಸುಟಿ ಈರುಳ್ಳಿ ತಂಬುಳಿ ಇದ್ದುಬಿಟ್ಟರೆ....... ಸ್ವರ್ಗಕ್ಕೆ ಎರಡೇಗೇಣು ನೋಡಿ :)

ಮಧ್ಯಮಗಾತ್ರದ ಒಂದು ಪುಟ್ಟ ಈರುಳ್ಳಿ+ ಅರ್ಧ ಚಮಚ ಜೀರಿಗೆಯನ್ನು ೩=೪ ಚಮಚ ಕಾಯಿತುರಿಯೊಂದಿಗೆ ಹಸೀ ಬೀಸಿಕೊಳ್ಳಿ. ಇದಕ್ಕೆ ೨-೩ ಸೌಟು (ಬೇಕಿದ್ದರೆ ಎರಡು ಸೌಟು ಜಾಸ್ತಿ...:)) ಮಜ್ಜಿಗೆಯನ್ನು ಹಾಕಿ, ರುಚಿಗೆ ತಕ್ಕ ಉಪ್ಪು ಹಾಕಿ ಬೆರಸಿ. ದಪ್ಪಗಾಗಬೇಕೆಂದರೆ ಕಾಯಿತುರಿಯನ್ನೋ ಇಲ್ಲಾ ಮಜ್ಜಿಗೆಯನ್ನೋ ಜಾಸ್ತಿ ಹಾಕಬಹುದು. ತೆಳ್ಳಗೆ ಬೇಕೆನ್ನುವವರು ಸ್ವಲ್ಪ ನೀರನ್ನು ಬೆರೆಸಬಹುದು.

ತದನಂತರ ೧/೪ ಚಮಚ್ಚ ಸಾಸಿವೆ+ಒಂದು ಕಡ್ಡಿಮೆಣಸಿನ ಚೂರನ್ನು ಹಾಕಿ ತುಪ್ಪದಲ್ಲಿಯೋ ಇಲ್ಲಾ ಎಣ್ಣೆಯಲ್ಲಿಯೋ (೧/೨ ಚಮಚವೂ ಬೇಡ.. ಸಾಸಿವೆ ಚಟಗುಡುವಷ್ಟು ಹಾಕಿದರೆ ಸಾಕು..) ಒಗ್ಗರಿಸಿದರೆ ೫ ನಿಮಿಷದೊಳಗೆ ರುಚಿ ರುಚಿ, ಆರೋಗ್ಯಕರ ಈರುಳ್ಳಿ ತಂಬ್ಳಿ ರೆಡಿ :)

ಇದು ಶೀತ, ಕಫ, ಕೆಮ್ಮು, ಸ್ವಾದ ಕೆಟ್ಟಿದ್ದರೆ - ಎಲ್ಲವುದಕ್ಕೂ ರಾಮಬಾಣ.

ಇನ್ನು ತುಂಬಾ ಗಂಟಲು ಕೆರೆತ ಇದ್ದವರು, ಮಜ್ಜಿಗೆ ತಂಪು ಎಂದಾದಲ್ಲಿ ಹೀಗೆ ಮಾಡಿ: - 

ಈರುಳ್ಳಿ+ಜೀರಿಗೆ+ಕಾಯಿತುರಿ ಬೀಸಿದ ನಂತರ ತುಸುವೇ ನೀರನ್ನು ಹಾಕಿ ಒಲೆಯಲ್ಲಿಟ್ಟು ಒಂದು ಗುಳ್ಳೆಬರುವವರೆಗೆ ಬಿಸಿಮಾಡಿ (ನೆನಪಿಡಿ.. ಕುದಿಸಬೇಡಿ!). ಗ್ಯಾಸ್ ನಂದಿಸಿ ಮಜ್ಜಿಗೆ ಬೆರೆಸಿ, ಒಗ್ಗರಿಸಿದರೆ ಗಂಟಲು ಕೆರೆತ, ನೆಗಡಿ ಸಾಕಷ್ಟು ಶಮನವಾಗುವುದು.

$$$$$$$$$$$$$$$$$

ಸಾಂಬ್ರಾಣಿ ಸೊಪ್ಪಿನ ತಂಬುಳಿಯೂ ಶೀತ, ಕೆಮ್ಮಿಗೆ ತುಂಬಾ ಪರಿಣಾಮಕಾರಿ. ಅದರಲ್ಲೂ ಮಕ್ಕಳಿಗೆ ಶೀತವಿದ್ದಾಗ ಇದನ್ನು ಉಣಿಸುವುದು ಉತ್ತಮ.

೫-೬ ಸಾಂಬ್ರಾಣಿ ಸೊಪ್ಪುಗಳನ್ನು ಚೂರುಮಾಡಿಟ್ಟುಕೊಳ್ಳಬೇಕು. ಈ ಚೂರುಗಳನ್ನು ೨ ಚಮಚ ಬಿಳೇ ಎಳ್ಳು +೧/೨ ಚಮಚ ಜೀರಿಗೆ + ಚಿಟಿಕೆ ಇಂಗು - ಇವಿಷ್ಟನ್ನು ೧ ಚಿಕ್ಕ ಚಮಚ ತುಪ್ಪದಲ್ಲಿ ಹುರಿದು, ೩-೪ ಚಮಚ ಕಾಯಿತುರಿಯೊಂದಿಗೆ ಬೀಸಿ, ಮೇಲೆ ಹೇಳಿರುವಂತೇ ಬಿಸಿಮಾಡಿ, ಮಜ್ಜಿಗೆ ಬೆರೆಸಿದರೆ ಶೀತಕ್ಕೆ ಚಳಿಹಿಡಿಯುವುದು :)

----------

(ವಿ.ಸೂ... ಮೊಸರನ್ನು ಇಷ್ಟಪಡುವವರು..  ಮಜ್ಜಿಗೆಯ ಬದಲು ಮೊಸರನ್ನೂ ಉಪಯೋಗಿಸಬಹುದು.... ೨-೩ ಸೌಟು ಮೊಸರನ್ನೇ ಮಿಕ್ಸಿಯಲ್ಲಿ ಹಾಕಿ ಒಮ್ಮೆ ತಿರುಗಿಸಿದರೆ ಅದು ತೆಳ್ಳಗಾಗುತ್ತದೆ.. ಅದಕ್ಕೆ ನೀರು ಸ್ವಲ್ಪ ಸೇರಿಸಿ ಬೀಸಿದ ಮಿಶ್ರಣಕ್ಕೆ ಹಾಕಿ ಹದಮಾಡಬಹುದು.)

-ತೇಜಸ್ವಿನಿ

Thursday, March 14, 2013

ಬಿಸಿ ಬಿಸಿ ಬೇಸಿಗೆಗೆ ತಂಪು ತಂಪು ವಿವಿಧ ತಂಬುಳಿಗಳು...


ಬೇಸಿಗೆಯ ಧಗೆಯ ಅನುಭವ ಎಲ್ಲೆಡೆ ಈಗಾಗಲೇ ಶುರುವಾಗಿದೆ.. ಅಲ್ಲಲ್ಲಿ ಮಳೆಯಾಗುತ್ತಿದ್ದರೂ ಮೋಡಗಟ್ಟಿದ ವಾತಾವರಣ ಒಳ-ಹೊರಗೆ ತಾಪ ಹೆಚ್ಚಿಸುತ್ತಿದೆ. ದೇಹದ ಉಷ್ಣತೆಯ ಹೆಚ್ಚಳದಿಂದಾಗಿ ಹತ್ತು ಹಲವು ಸಮಸ್ಯೆಗಳು ತಲೆದೋರುವುದು ಸಹಜ. ಹೀಗಿರುವಾಗ ತೆಳ್ಳಗೆ, ತಂಪಾಗಿರುವ ಪದಾರ್ಥವನ್ನು ಸೇವಿಸುವ ಮನಸ್ಸಾಗುವುದು. ನಮ್ಮಲ್ಲಿ ಅಂದರೆ ಹವ್ಯಕರಲ್ಲಿ ವಿವಿಧ ರೀತಿಯ ತಂಬುಳಿಗಳನ್ನು ಮಾಡುತ್ತಾರೆ. ಇವುಗಳನ್ನು ಹಾಗೇ ತಂಫು ಪಾನೀಯದಂತೆಯೋ ಇಲ್ಲಾ ಸೂಪ್‌ನಂತೆಯೋ ಕುಡಿಯಬಹುದು ಇಲ್ಲವೇ ಅನ್ನಕ್ಕೆ ಕಲಸಿ ತಿನ್ನಬಹುದು.

Copy Right : Tejaswini Hegde
ತಂಬುಳಿಗಳ ಉಪಯೋಗಗಳು : - 

೧. ದೇಹದ ಉಷ್ಣತೆಯು ಹೆಚ್ಚಾಗದಂತೇ ತಡೆಯುತ್ತವೆ... ಬಾಯಿ ಹುಣ್ಣು, ಕಣ್ಣುರಿ, ತಲೆ ಸಿಡಿತ, ಹೊಟ್ಟೆಯುರಿ, ಮಲಬದ್ಧತೆ, ಪಿತ್ಥ, ಗಾಸ್ಟ್ರಿಕ್ ಇಂತಹ ರೋಗಗಳಿಂದ ನಮ್ಮನ್ನು ದೂರವಿಡುತ್ತವೆ.

೨. ಕಣ್ಣಿಗೆ, ಉದರಕ್ಕೆ ತಂಪಲ್ಲದೇ ನೆತ್ತಿಗೂ ತಂಪು ತರುತ್ತವೆ. ಎದೆಯುರಿ ಹೆಚ್ಚಾಗಿದ್ದರೆ, ಈ ತಂಬುಳಿಗಳನ್ನು ಮಾಡಿ ಕುಡಿದರೆ ಬಹು ಬೇಗ ಶಮನವಾಗುತ್ತದೆ.

೩. ಆಯಾಸ ಹೆಚ್ಚಾದಾಗ, ಬಾಯಿರುಚಿ ಕೆಟ್ಟಿದೆ ಎಂದೆನಿಸಿದಾಗಲೂ ಇವು ಸಹಕಾರಿಯಾಗಿವೆ.

ಒಟ್ಟಿನಲ್ಲಿ ಬಹೋಪಯೋಗಿ ತಂಬುಳಿಗಳ ಸೇವನೆಯಿಂದ ಆರೋಗ್ಯವು ಸುಧಾರಿಸುವುದಲ್ಲದೇ ಸದೃಢವಾಗಿರುವುದು.


ಮಾಡಲು ಸುಲಭ, ಸರಳ, ಬೇಕಾಗುವ ಪದಾರ್ಥಗಳೂ ಅತ್ಯಂತ ಕಡಿಮೆ. ಆರೋಗ್ಯಕ್ಕೆ ಹಿತಕರ, ಬಾಯಿಗೂ ರುಚಿಕರ ತಂಬುಳಿಗಳನ್ನು ತಯಾರಿಸುವ ವಿಧಾನವೂ ಹೆಚ್ಚು ಕಡಿಮೆ ಒಂದೇ ರೀತಿಯದ್ದಾಗಿರುತ್ತದೆ.

ಬೇಕಾಗುವ ಸಾಮಗ್ರಿಗಳು - (೩-೪ ಜನರಿಗೆ) :-

ಒಂದು ಕಟ್ಟು ಮೆಂತೆ ಸೊಪ್ಪು/ ಪಾಲಕ್ ಸೊಪ್ಪು/ಅತ್ತಿ ಕುಡಿ (ಯಾವುದಾದರೂ ಒಂದು ಸಾಮಗ್ರಿ)

ಜೀರಿಗೆ - ೧ ಚಮಚ (ಟೇಬಲ್ ಸ್ಪೂನ್)
ಬಿಳೇ ಎಳ್ಳು - ೧/೨ ಚಮಚ
ಇಂಗು - ಒಂದೆರಡು ಕಾಳು...(ಪುಡಿಯಾಗಿದ್ದರೆ ಚಿಟಿಕೆ)
ತುಪ್ಪ ಅಥವಾ ಎಣ್ಣೆ - ೧ - ೨ ಚಮಚ. (ತುಪ್ಪದಲ್ಲಿ ಮಾಡಿದರೆ ಮತ್ತೂ ರುಚಿಕರ ಹಾಗೂ ಆರೋಗ್ಯಕ್ಕೂ ಉತ್ತಮ.)
ತೆಂಗಿನ ತುರಿ - ೪ ಚಮಚ
ಮಜ್ಜಿಗೆ ಅಥವಾ ಮೊಸರು  - ೩-೪ ಸೌಟು.
ಉಪ್ಪು - ರುಚಿಗೆ ತಕ್ಕಷ್ಟು.
ಬೆಲ್ಲ - 1-2 ಚಮಚ
------

ಮೆಂತೆಸೊಪ್ಪಿನ ತಂಬುಳಿ ಮಾಡುವ ವಿಧಾನ : ಸೊಪ್ಪುಗಳನ್ನು ಚೆನ್ನಾಗಿ ತೊಳೆದು ಕತ್ತರಿಸಬೇಕು.

ಮೆಂತೆಸೊಪ್ಪಿನ ತಂಬುಳಿ ಮಾಡುವ ಮೊದಲುಸೊಪ್ಪನ್ನು ತೊಳೆದಮೇಲೆ ಹೆಚ್ಚಿ, ಸ್ವಲ್ಪ ಉಪ್ಪು ತಿಕ್ಕಿ ೧೦ ನಿಮಿಷ ಇಟ್ಟುಕೊಂಡಿರಬೇಕಾಗುತ್ತದೆ. (ಇದರಿಂದ ಕಹಿಯಂಶ ಕಡಿಮೆಯಾಗಿ ತಿನ್ನಲು ರುಚಿಕರವಾಗಿರುತ್ತದೆ. ಕಹಿ ಅಂಶ ಇಷ್ಟಪಡುವವರು ಹಾಗೇ ಮಾಡಿಕೊಳ್ಳಬಹುದು.)

ಬಾಣಲೆಗೆ ತುಪ್ಪ ಅಥವಾ ಎಣ್ಣೆ ಹಾಕಿ ಜೀರಿಗೆ + ಬಿಳೇ ಎಳ್ಳು +(ಈ ತಂಬುಳಿಗೆ ಬೇಕಿದ್ದರೆ ಮಾತ್ರ ಹಾಕಬಹುದು) ಚಿಟಿಕೆ ಇಂಗು - ಇವುಗಳನ್ನು ಹಾಗಿ ಒಗ್ಗರಿಸಿಕೊಂಡು, ಉಪ್ಪು ತಿಕ್ಕಿಟ್ಟಿದ್ದ ಮೆಂತೆ ಸೊಪ್ಪನ್ನು ಹಿಂಡಿ ಹಾಕಿ ಹುರಿಯಬೇಕು. ಕಹಿ ಬಿಟ್ಟಿರುವ ರಸವನ್ನು ಹಿಂಡಿ ಹಾಕುವುದರಿಂದ ತಿನ್ನುವಾಗ ಕಹಿಯೆನಿಸುವುದಿಲ್ಲ.

ಬಹು ಬೇಗ ಹುರಿದು ಬರುವ ಸೊಪ್ಪನ್ನು ತಣಿಯಲಿಡಬೇಕು. ನೆನಪಿಡಿ ಯಾವುದೇ ಸೊಪ್ಪಿರಲಿ.. ಹುರಿದು ಮಾಡುವಂಥದ್ದಾಗಿದ್ದರೆ, ಸಂಪೂರ್ಣ ತಣಿದ ಮೇಲೆ ಕಾಯಿಹಾಕಿ ರುಬ್ಬಬೇಕು.. ಬಿಸಿ ಇರುವಾಗಲೇ ರುಬ್ಬಿದರೆ ಕಸರು(ಕಮಟು) ವಾಸನೆ ಬರುತ್ತದೆ.

ತಣಿದ ಮೇಲೆ ಕಾಯಿತುರಿಯೊಂದಿಗೆ ನುಣ್ಣಗೆ ರುಬ್ಬಿ, ಮಜ್ಜಿಗೆ + ಉಪ್ಪು ಹಾಕಿ, ತೆಳ್ಳಗೆ ಬೇಕಿದ್ದರೆ ತುಸು ನೀರನ್ನೋ ಇಲ್ಲಾ ಮತ್ತೊಂದು ಸೌಟು ಮಜ್ಜಿಗೆಯನ್ನೋ ಹಾಕಿದರೆ ರುಚಿಕರ ಮೆಂತೆ ತಂಬುಳಿ ರೆಡಿ. ಸಿಹಿಯನ್ನು ಇಷ್ಟಪಡುವವರು... ಕಹಿಯೆನಿಸುವವರು... ಸ್ವಲ್ಪ ಬೆಲ್ಲವನ್ನು ಹಾಕಿ ಕರಗಿಸಿಕೊಳ್ಳಬಹುದು. ಮತ್ತಷ್ಟು ರುಚಿಕರವಾಗುತ್ತದೆ.

ವಿ.ಸೂ : - ೧. ಸೊಪ್ಪನ್ನು ತುಂಬಾ ಹೊತ್ತು ಉಪ್ಪಲ್ಲಿ ಹಾಕಿಡಬೇಡಿ.. ಅದರ ಕಹಿಯಂಶ ಸಂಪೂರ್ಣ ಹೋಗಿ, ಅದರೊಳಗಿನ ಉತ್ತಮ ಸತ್ವವೆಲ್ಲಾ ಉಪ್ಪಲ್ಲಿ ಕರಗಿಹೋಗಬಹುದು! 

೨. ಮಜ್ಜಿಗೆಯ ಬದಲು ಮೊಸರನ್ನೂ ಉಪಯೋಗಿಸಬಹುದು.... ೨-೩ ಸೌಟು ಮೊಸರನ್ನೇ ಮಿಕ್ಸಿಯಲ್ಲಿ ಹಾಕಿ ಒಮ್ಮೆ ತಿರುಗಿಸಿದರೆ ಅದು ತೆಳ್ಳಗಾಗುತ್ತದೆ.. ಅದಕ್ಕೆ ನೀರು ಸ್ವಲ್ಪ ಸೇರಿಸಿ ಬೀಸಿದ ಮಿಶ್ರಣಕ್ಕೆ ಹಾಕಿ ಹದಮಾಡಬಹುದು.


ಪಾಲಾಕ್ ಸೊಪ್ಪಿನ ತಂಬುಳಿ

ಮೇಲೆ ಹೇಳಿದ ಸಾಮಾಗ್ರಿಗಳನ್ನೇ ಉಪಯೋಗಿಸಿ ಒಗ್ಗರಿಸಿಕೊಂಡು, ಹೆಚ್ಚಿಟ್ಟಿದ್ದ ಸೊಪ್ಪನ್ನೂ ಹಾಕಿ ಹುರಿದು, ತಣಿದ ನಂತರ ಕಾಯಿಯೊಂದಿಗೆ ಬೀಸಿ, ಉಪ್ಪು ಮಜ್ಜಿಗೆ ಬೆರೆಸಿದರೆ ಆಯಿತು. ಈ ತಂಬುಳಿಗೆ ಇಂಗು ಹಾಕಿದರೆ ಮತ್ತೂ ರುಚಿಕರ. ಹಾಗಾಗಿ ತಪ್ಪದೇ ಒಗ್ಗರಣೆಗೆ ಹಾಕಿ. ಬೆಲ್ಲವನ್ನು ಹಾಕಬಾರದು.

ಅತ್ತಿಕುಡಿ ತಂಬುಳಿ

ಅತ್ತಿ ಕುಡಿಯ ಹಸಿರಾದ ಚಿಗುರೆಲೆಗಳು - ೧೦-೧೫ (ಬಲಿತ ದೊಡ್ಡ ಎಲೆಗಳಲ್ಲಾ!)... ಚೆನ್ನಾಗಿ ತೊಳೆದು ಹೆಚ್ಚಿಟ್ಟುಕೊಂಡು ಮೇಲೆ ಪಾಲಾಕ್ ಸೊಪ್ಪಿನ ತಂಬುಳಿಯ ವಿಧಾನದಂತೇ ಮಾಡಿಕೊಳ್ಳುವುದು. ಆಮೇಲೆ ಸ್ವಲ್ಪ ಬೆಲ್ಲವನ್ನೂ ಸೇರಿಸಬೇಕು.


ಇದೇ ರೀತಿ ನೆಲನೆಲ್ಲಿತಂಬುಳಿಯನ್ನೂ ಮಾಡುತ್ತಾರೆ..ಆದರೆ ಇದಕ್ಕೆ ಕರಿಮೆಣಸಿನ ಕಾಳುಗಳನ್ನು ಸೇರಿಸುತ್ತಾರಷ್ಟೇ.. ಇದನ್ನು ಮಾಡುವ ವಿಧಾನವನ್ನು ಮೊದಲೇ ವಿವರಿಸಿದ್ದು.. ಅದಕ್ಕಾಗಿ ಇಲ್ಲಿ ಕ್ಲಿಕ್ಕಿಸಿ - "ನೆಲನೆಲ್ಲಿ"




ಹುರಿಯದೇ ಹಸಿಯಾಗಿ ಬೀಸಿ ಮಾಡುವ ತಂಬುಳಿಗಳು - 

ಲೆಮನ್ ಗ್ರಾಸ್ ಅಥವಾ ಮಜ್ಜಿಗೆ ಹುಲ್ಲಿನ ತಂಬುಳಿ :- 
೩-೪ ಮಜ್ಜಿಗೆ ಹುಲ್ಲನ್ನು ಕತ್ತರಿಸಿಟ್ಟುಕೊಂಡು ಅದಕ್ಕೆ ಹೆಬ್ಬೆರಳಿನ ಗಾತ್ರದ ಶುಂಠಿಯನ್ನು ಹೆಚ್ಚು ಹಾಕಿ, ಕಾಯಿತುರಿಯೊಂದಿಗೆ (೪-೫ ಚಮಚ) ಹಸಿಯಾಗಿ ಬೀಸಬೇಕು. ತದನಂತರ ಚೆನ್ನಾಗಿ ಸೋಸಿ ಅದರ ರಸವನ್ನಷ್ಟೇ ಹಿಂಡಿ ತೆಗೆದು, ಮಜ್ಜಿಗೆಯನ್ನೋ ಇಲ್ಲಾ ಮೇಲೆ ಹೇಳಿದಂತೇ (ಮೆಂತೆಸೊಪ್ಪಿನ ತಂಬುಳಿಗೆ..) ಮೊಸರನ್ನೋ ಸೇರಿಸಿ, ಉಪ್ಪು ಹಾಕಿದರೆ ಬಲುರುಚಿಕರ, ಆರೋಗ್ಯಕರ ಲೆಮನ್ ಗ್ರಾಸ್ ತಂಬುಳಿ ರೆಡಿ!

ಇದೇ ರೀತಿ ಕೊತ್ತುಂಬರಿ ಸೊಪ್ಪಿನ ತಂಬುಳಿಯನ್ನೂ ಮಾಡುತ್ತಾರೆ. : -
ಒಂದು ಪುಷ್ಠಿ ಕೊತ್ತುಂಬರಿ ಸೊಪ್ಪನ್ನು ಚೆನ್ನಾಗಿ ತೊಳೆದು ಅದಕ್ಕೆ ಹೆಬ್ಬೆರಳಿನ ಗಾತ್ರದ ಶುಂಠಿ ಸೇರಿಸಿ ಕಾಯಿಯೊಂದಿಗೆ ಹಸಿಯಾಗಿ ಬೀಸಬೇಕು. ಇದು ನುಣ್ಣಗೆ ಬೀಸಲು ಸಾಧ್ಯವಿರುವುದರಿಂದ ಸೋಸುವ ತಾಪತ್ರವಿಲ್ಲ. ಹಾಗೇ ಬೀಸಿದ ಮಿಶ್ರಣಕ್ಕೆ ಮಜ್ಜಿಗೆ+ಉಪ್ಪು ಬೇಕಿದ್ದರೆ ನೀರು ಹಾಕಿ ಹದಮಾಡಿಕೊಳ್ಳುವುದು. ಈ ತಂಬುಳಿಗೆ ಬೆಲ್ಲ ಹಾಕಲೇಬಾರದು! ರುಚಿಗೆಡುತ್ತದೆ.

---------

ಕರಿಬೇವಿನ ತಂಬುಳಿ, ಈರುಳ್ಳಿ ತಂಬುಳಿ, ವಿಟಮಿನ್ ಎಲೆಯ ತಂಬುಳಿ, ಎಲವರಿಗೆ ಕುಡಿಯ ತಂಬುಳಿ - ಹೀಗೆ ಹತ್ತು ಹಲವುಬಗೆಯ ತಂಬುಳಿಗಳಿವೆ... ಆಸಕ್ತರು ನನ್ನನ್ನು ಮೈಲ್ ಮೂಲಕ ಸಂಪರ್ಕಿಸಬಹುದು :).

-ತೇಜಸ್ವಿನಿ ಹೆಗಡೆ.