Monday, January 11, 2021

ಜಂಬುನೇರಳೆ ಹಣ್ಣಿನ ಉಪ್ಪಿನಕಾಯಿ



ಬೇಕಾಗುವ ಸಾಮಗ್ರಿಗಳು

ಜಂಬು ನೇರಳೆಹಣ್ಣುಗಳು - 25

ರುಚಿಗೆ ತಕ್ಕಷ್ಟು ಉಪ್ಪು ಮತ್ತು ಬೆಲ್ಲ - (ಇಷ್ಟು ಪ್ರಮಾಣದ ಹಣ್ಣಿಗೆ ಸುಮಾರು 1 ಚಮಚ ಹುಡಿಯುಪ್ಪು ಹಾಗೂ 3 ಚಮಚ ಬೆಲ್ಲವನ್ನು ಹಾಕಲಾಗಿದೆ.) 

ಅಚ್ಚಖಾರದ ಹುಡಿ, ಸಿಹಿ-ಹುಳಿಗೆ ತಕ್ಕಷ್ಟು(ಇಲ್ಲಿ ಸುಮಾರು ಮೂರು ಚಮಚ ಹಾಕಲಾಗಿದೆ.)

ಹುರಿದ ಮೆಂತೆ ಹುಡಿ - 1/2 ಚಮಚ

ಸಣ್ಣ ಚಮಚದಲ್ಲಿ ಒಂದು ಚಮಚ ಸಾಸಿವೆ

ಕರಿಬೇವು - 15 ಎಸಳು 

ತೆಂಗಿನೆಣ್ಣೆ - 3 ಚಮಚ 


ಮಾಡುವ ವಿಧಾನ

* ತಯಾರಿಸುವ ಹಿಂದಿನ ದಿನವೇ ಹಣ್ಣುಗಳನ್ನು ಚೆನ್ನಾಗಿ ಸ್ವಚ್ಛ ಮಾಡಿಕೊಂಡು ಸಣ್ಣಸಣ್ಣ ಹೋಳುಗಳನ್ನಾಗಿಸಿ, ಅವುಗಳಿಗೆ ಉಪ್ಪು ಹಾಕಿ ಒತ್ತಿಟ್ಟುಕೊಳ್ಳಬೇಕು. 

*ಮರು ದಿವಸ ಎಣ್ಣೆಯನ್ನು ಕಾಯಿಸಿ, ಅದಕ್ಕೆ ಸಾಸಿವೆ ಮತ್ತು ಕರಿಬೇವಿನೆಸಳುಗಳನ್ನು ಹಾಕಿ ಒಗ್ಗರಿಸಿ. 

ನಂತರ ಇದಕ್ಕೆ, ಹಿಂದಿನದಿನವೇ ಉಪ್ಪಲ್ಲಿ ಹಾಕಿಟ್ಟಿದ್ದ ಜಂಬುನೇರಳೆ ಹಣ್ಣಿನ ಹೋಳುಗಳನ್ನು ಹಾಕಿ ಹದಿನೈದು ನಿಮಿಷ ಕೈಯಾಡಿಸುವುದು. ಹದಿನೈದುನಿಮಿಷದಲ್ಲಿ ಉಪ್ಪು ನೀರು ಬಿಟ್ಟು ಹೋಳು ಬೇಯುತ್ತದೆ.

(ನೆನಪಿರಲಿ ಸಣ್ಣ ಉರಿಯಲ್ಲಿ ಮೊಗಚುತ್ತಿರಬೇಕು.)ಮ್

*ಉಪ್ಪಲ್ಲಿ ಬೆಂದ ಹೋಳುಗಳಿಗೆ ಮೆಂತೆ ಪುಡಿ ಹಾಕಿ, ಒಂದೆರಡು ಸಲ ಕೈಯಾಡಿಸುವುದು.

*ಈ ಮಿಶ್ರಣಕ್ಕೆ (ಗಟ್ಟಿ ಬೆಲ್ಲವಾದರೆ ಕರಗಿಸಿಕೊಂಡು) ಬೆಲ್ಲ ಮತ್ತು ಖಾರದಪುಡಿ ಹಾಕಿ ಹತ್ತು ನಿಮಿಷ ತೊಳೆಸಬೇಕು. 

*ಆಮೇಲೆ ಉಪ್ಪು, ಖಾರ ಎಲ್ಲವನ್ನೂ ಹದ ನೋಡಿ ಬೇಕಿದ್ದರೆ ಮೇಲಿಂದ ತುಸು ಹಾಕಿಕೊಂಡು ಮತ್ತೆ ಒಂದೆರಡು ನಿಮಿಷ ಕೈಯಾಡಿಸಿಬಿಡಿ.

*ಉಪ್ಪಿನಕಾಯಿ ತಣಿದ ನಂತರ ಗಾಜಿನ ಬಾಟ್ಲಿಯಲ್ಲಿಹಾಕಿ ಫ್ರಿಜ್ಜಿನಲ್ಲಿಡಿ. ಬೇಕಾದಾಗ ತೋಡಿಕೊಂಡು ಉಪಯೋಗಿಸಿದರೆ ಎರಡು ತಿಂಗಳವರೆಗೆ ಕೆಡದೇ ಚೆನ್ನಾಗಿರುತ್ತದೆ.


~ತೇಜಸ್ವಿನಿ ಹೆಗಡೆ


Friday, October 30, 2020

ಸಿಹಿ ಕುಂಬಳಕಾಯಿ (ಚೀನಿಕಾಯಿ) ಅತ್ರಾಸ

Sweet pumpkin, ಸೀಗುಂಬ್ಳ ಅಥವಾ ಚೀನಿಕಾಯಿಯು ಆರೋಗ್ಯಕ್ಕೆ ಬಹಳ ಉತ್ತಮವಾದದ್ದು. ಇದರೊಳಗಿರುವ ಪೊಟಾಶಿಯಮ್ ಮತ್ತು ಬೀಟಾ ಕೆರೋಟಿನ್ ಕಣ್ಣಿಗೆ, ಹೃದಯಕ್ಕೆ, ರಕ್ತದೊತ್ತಡಕ್ಕೆ ಚರ್ಮದ ಹೊಳಪಿಗೆ ಹೀಗೆ ಹಲವು ರೀತಿಯಲ್ಲಿ ಇದು ಬಹಳ ಉಪಯೋಗಿ ಎಂದು ಹೇಳುತ್ತಾರೆ. ನಾವು ಇದರಿಂದ ಪಲ್ಯ, ಕೊದ್ದೆಲು, ಸಾಂಬಾರು, ಕಡುಬು, ಅತ್ರಾಸ – ಇತ್ಯಾದಿ ತಿನಿಸುಗಳನ್ನು ಮಾಡುತ್ತೇವೆ. ಕೊದ್ದಲು ಮಾದುವ ವಿಧಾನವನ್ನು ಇದೇ ಬ್ಲಾಗಿನಲ್ಲಿ ಹಾಕಿದ್ದು ಅದಕ್ಕಾಗಿ ಈ ಕೆಳಗಿನ ಲಿಂಕಿಗೆ ಭೇಟಿಕೊಡಬಹುದು… 👇👇

ಚೀನಿಕಾಯಿ ಕೊದ್ದೆಲು 

http://tejaswini-hegde.blogspot.com/2018/02/blog-post.html



 ಅತ್ರಾಸವನ್ನು ತಯಾರಿಸಲು ಬೇಕಾಗುವ ಸಾಮಗ್ರಿಗಳು:

 ೧) ಚೀನಿಕಾಯಿ – ೧/೪ ಕೆ.ಜಿ.

೨) ತೆಂಗಿನ ತುರಿ – ಸಣ್ಣ ಕಾಯಿಯಲ್ಲಿ ಅರ್ಧಭಾಗ

೩) ಅಕ್ಕಿ ಹಿಟ್ಟು – ೧/೪ ಕೆ.ಜಿ. (ಗಾಳಿಸಿಕೊಂಡಿರಬೇಕು)

೪) ಪರಿಮಳಕ್ಕೆ ಒಂದು ಚಮಚ ಏಲಕ್ಕಿ ಹುಡಿ

೫) ಬಿಳೇ ಎಳ್ಳು - ಎರಡು ಚಮಚ

೬) ಕರಿಯಲು ಎಣ್ಣೆ

೭) ಬೆಲ್ಲ – ಮುಕ್ಕಾಲು ಲೋಟ (ನೀರಾಗಿಸಿದ್ದು)

೮) ಉಪ್ಪು – ೧/೨ ಚಮಚ (ರುಚಿಗೆ ತಕ್ಕಷ್ಟು)

 ಮಾಡುವ ವಿಧಾನ: 

  • ಚೀನಿಕಾಯಿಯನ್ನು ತುರಿದುಕೊಳ್ಳಿ. ಇದಕ್ಕೆ ಹೆರೆದಿಟ್ಟಿಕೊಂಡಿರುವ ಕಾಯಿತುರಿಯನ್ನು ಸೇರಿಸಿ, ತುಸು ನೀರು ಚಿಮುಕಿಸಿ ಒಂದು ೫ ನಿಮಿಷ ಬೇಯಿಸಿಕೊಳ್ಳುವುದು.
  • ಸೀಗುಂಬ್ಳದಲ್ಲೇ ಸಿಹಿಯಂಶ ಇರುವುದರಿಂದ ಹೆಚ್ಚು ಬೆಲ್ಲ ಬೇಕಾಗುವುದಿಲ್ಲ. ಅಕ್ಕಿಹಿಟ್ಟನ್ನು ಯಾವ ಲೋಟದಲ್ಲಿ ಅಳತೆಗೆ ತೆಗೆದುಕೊಳ್ಳುವಿರೋ ಅದೇ ಲೋಟದಳತೆಯಲ್ಲಿ ಸುಮಾರು ಮುಕ್ಕಾಲು ಲೋಟ ಅಳತೆಯ ಬೆಲ್ಲವನ್ನು ಈ ಮಿಶ್ರಣಕ್ಕೆ ಹಾಕಿ.  ಗಮನಿಸಿ, ಇಲ್ಲಿ ನಾವು ತೆಗೆದುಕೊಂಡಿದ್ದು ಊರಿನ ಪಾಕ ಬೆಲ್ಲವನ್ನು. ಅದು ಮೊದಲೇ ನೀರಾಗಿರುತ್ತದೆ. ಅದನ್ನು ಮುಕ್ಕಾಲು ಲೋಟದಷ್ಟು ಹಾಕಲಾಗಿದೆ.
  • ಬೆಲ್ಲಹಾಕಿದ ಮೇಲೆ ಮಿಶ್ರಣಕ್ಕೆ ಉಪ್ಪು ಸೇರಿಸಿ ಸುಮಾರು ೧೫ ನಿಮಿಷ ಚೆನ್ನಾಗಿ ಕುದಿಸಿ. ಚೀನಿಕಾಯಿ, ತೆಂಗಿನತುರಿ ಎಲ್ಲವೂ ನೀರಾಗಿ ಕುದಿಯುವುದು.
  • ಇದಕ್ಕೆ ಅಕ್ಕಿಹಿಟ್ಟು ಹಾಗೂ ಹುರಿದಿಟ್ಟುಕೊಂಡಿರುವ ಎರಡು ಚಮಚ ಬಿಳೇ ಎಳ್ಳನ್ನು ಹಾಕಿ ಸಣ್ಣ ಉರಿಯಲ್ಲಿ ತೊಳೆಸುತ್ತಾ ಇರಬೇಕು. ತುಸು ಹೊತ್ತಿಗೆ ಮಿಶ್ರಣ ಮುದ್ದೆಯಾಗಿ ಬರುತ್ತದೆ. ಮಿಶ್ರಣವು ಹದವಾಗಿದೆಯೆ ಎಂದು ತಿಳಿಯಲು ಅಂಗೈಗೆ ತುಪ್ಪ ಸವರಿಕೊಂಡು ಮುದ್ದೆಯಾದ ಮಿಶ್ರಣವನ್ನು ಸ್ವಲ ಮುಟ್ಟಿನೋಡಿ. ಹದವಾಗಿ ಬಂದಿದ್ದರೆ ಅದು ಅಂಗೈಗೆ ಅಂಟುವುದಿಲ್ಲ. ಆಗ ಗ್ಯಾಸ್ ಆಫ್ ಮಾಡಿಬಿಡಿ.
  • ಹದಗೊಂಡ ಮಿಶ್ರಣವನ್ನು ಸುಮಾರು ೧೫ ನಿಮಿಷಗಳ ಕಾಲ ಮುಚ್ಚಿಡಬೇಕು.
  • ಬಾಳೆಯೆಲೆಯ ಮೇಲೋ ಇಲ್ಲಾ ಹೋಳಿಗೆ ಮಾಡುವ ಕವರಿನ ಮೇಲೋ ತುಪ್ಪ ಸವರಿಕೊಂಡ ಕೈಯಲ್ಲಿ ಮಿಶ್ರಣವನ್ನು ನುಣ್ಣಗೆ ಉಂಡೆಮಾಡಿಕೊಂಡು ಅಂಗೈಯಲ್ಲಿ ಒತ್ತಿಕೊಳ್ಳಿ.
  • ಕರಿಯಲು ಎಣ್ಣೆಯನ್ನು ಬಿಸಿಮಾಡಿಕೊಂಡು ಮಧ್ಯಮ ಉರಿಯಲ್ಲೇ (ಸಣ್ಣ ಅಥವಾ ದೊಡ್ಡ ಉರಿಯಲ್ಲಲ್ಲ) ಕವರಿನ ಮೇಲೆ ಒತ್ತಿಕೊಂಡಿದ್ದನ್ನು ಎಣ್ಣೆಗೆ ಹಾಕಿ ಚೆನ್ನಾಗಿ ಕರಿಯಿರಿ. ಬಂಡಿಗೆಹಾಕಿದ ಮೇಲೆ ಅದು ಕರಿದುಬರುವಾಗಲೇ ಜಾಲಿ ಹುಟ್ಟಿನಿಂದ ತಟ್ಟಿದರೆ ಅದು ಉಬ್ಬುವುದು. ಮಗುಚಿಹಾಕಿ ಕೆಂಪಗೆ ಬೇಯಿಸಿ ತೆಗೆಯುವುದು.
  • ಚೆನ್ನಾಗಿ ಕರಿದ ಈ ಅತ್ರಾಸವನ್ನು ಗಾಳಿಯಾಡದ ಡಬ್ಬದಲ್ಲಿಡಬೇಕು. ಈ ಅತ್ರಾಸಕ್ಕೆ ತಯಾರಿಸಿದ ದಿನಕ್ಕಿಂದ ಎರಡು ದಿನಗಳ ನಂತರವೇ ರುಚಿ ಹೆಚ್ಚು.

 ~ತೇಜಸ್ವಿನಿ ಹೆಗಡೆ.

 

Saturday, April 11, 2020

ರುಚಿಕರ ಹಾಗೂ ಆರೋಗ್ಯಕರ ಟೊಮೇಟೋ ಗೊಜ್ಜುಗಳು


ಈ ಲಾಕ್ ಡೌನ್ ಬಹಳ ಪಾಠ ಕಲಿಸಿದೆ. ಅವುಗಳಲ್ಲಿ ನಮ್ಮ ಆಹಾರ ಕ್ರಮದಲ್ಲಿ ಬದಲಾವಣೆಮಾಡಿಕೊಳ್ಳುವುದೂ ಒಂದು. ಏರುತ್ತಿರುವ ಬೆಲೆ, ಆದಷ್ಟು ನಾವು ಹೊರಬೀಳದಂತೇ ನೋಡಿಕೊಳ್ಳಬೇಕಾಗಿರುವ ಜವಾಬ್ದಾರಿಯಿಂದಾಗಿ ತೆಂಗಿನಕಾಯಿ ಬಳಸದ, ಹೆಚ್ಚು ತರಕಾರಿ ಹಾಕದೇ ಮಾಡುವಂತಹ ಅನೇಕ ಪದಾರ್ಥಗಳ ಅನ್ವೇಷಣೆಗೂ ದಾರಿಯಾಗಿದೆ! ಪ್ರಸ್ತುತ ನಾನಿಲ್ಲಿ ದೋಸೆ, ಚಪಾತಿ, ಇಡ್ಲಿಗಲ್ಲದೇ, ಅನ್ನಕ್ಕೂ ಕಲಿಸಿ ತಿನ್ನಬಹುದಾದಂಥ ಬಲು ರುಚಿಕರ ಟೊಮೇಟೋ ಗೊಜ್ಜನ್ನು (ತೆಂಗಿನ ಕಾಯಿ ಬಳಸದೇ ಮಾಡುವಂಥದ್ದು) ತಯಾರಿಸುವ ಎರಡು ರೀತಿಯ ವಿಧಾನವನ್ನು ವಿವರಿಸಿದ್ದೇನೆ.
ಮನೆಯ ಸುತ್ತಮುತ್ತ ನುಗ್ಗೆಮರವಿದ್ದರೆ ಅದರ ಸೊಪ್ಪಿನಿಂದ, ಮನೆಯಂಗಳದಲ್ಲಿ ಗೋಳಿಸೊಪ್ಪು (ಗಿಡಬಸಳೆ) ಬೆಳೆದಿದ್ದರೆ ಅದರಿಂದಲೋ ತೆಂಗಿನಕಾಯಿಯನ್ನು ಹಾಕದೇ ದಪ್ಪ ಸಾಂಬಾರನ್ನೂ ಮಾಡಬಹುದಾಗಿದೆ. ಅದರ ರೆಸಿಪಿಯನ್ನು ಮತ್ತೊಮ್ಮೆ ಹೇಳುವೆ. ಸದ್ಯಕೆ ಈಗ ಟೊಮೇಟೋ ಹಣ್ಣಿನಿಂದ ತಯಾರಿಸುವ ಎರಡು ರೀತಿಯ ಗೊಜ್ಜಿನ ವಿವರ ನೀಡುತ್ತಿದ್ದೇನೆ. ಮಾಡಿ ನೋಡಿರಿ.. ಸವಿದು ತಿಳಿಸಿರಿ. J

(ಸೂಚನೆ : ನಾನಿಲ್ಲಿ ೮ ಜನರಿಗೆ ಬೇಕಾಗುವ ಪ್ರಮಾಣ ನೀಡಿರುವೆ)
ವಿಧಾನ ೧

ಬೇಕಾಗುವ ಸಾಮಗ್ರಿಗಳು :-
೧. ಟೋಮೇಟೋ ಹಣ್ಣು – ದೊಡ್ಡ ಗಾತ್ರದ್ದಾಗಿದ್ದರೆ ೪, ಚಿಕ್ಕದ್ದಾಗಿದ್ದರೆ ೬
೨. ನೆಲಗಡಲೆ – ೩ ಚಮಚ
೩. ಬಿಳೇ ಎಳ್ಳು – ೩ ಚಮಚ
೪. ಕಡಲೆಬೇಳೆ – ೨ ಚಮಚ
೫. ಕರಿಬೇವು – ೮ ರಿಂದ ೧೦ ಎಸಳು
೬. ಇಂಗು – ರುಚಿಗೆ ತಕ್ಕಷ್ಟು
೭. ಖಾರಕ್ಕೆ ತಕ್ಕಷ್ಟು – ಹಸಿಮೆಣಸು ಅಥವಾ ಕೆಂಪುಮೆಣಸು. (ಕೆಂಪು ಮೆಣಸು ಹೆಚ್ಚು ಒಳ್ಳೆಯದು)
೮. ಉಪ್ಪು, ಹುಳಿ – ರುಚಿಗೆ ತಕ್ಕಷ್ಟು
೯. ತೆಂಗಿನೆಣ್ಣೆ – ೪ ಚಮಚ (ನೀವು ಅಡುಗೆಗೆ ಬಳಸುವ ಯಾವುದೇ ಎಣ್ಣೆ ಆಗಬಹುದು. ತೆಂಗಿನೆಣ್ಣೆ ಆರೋಗ್ಯಕ್ಕೆ ಉತ್ತಮ.)
೧೦. ಒಗ್ಗರಣೆಗೆ - ಸಾಸಿವೆ, ಕರಿಬೇವು, ಉದ್ದಿನಬೇಳೆ

ಮಾಡುವ ವಿಧಾನ : -
*ಮೊದಲು ಟೊಮೇಟೋವನ್ನು ಚಿಕ್ಕದಾಗಿ ಹೆಚ್ಚಿಟ್ಟುಕೊಳ್ಳಿ.
*ಬಾಣಲೆಗೆ ೨-೩ ಚಮಚ ಎಣ್ಣೆ ಹಾಕಿ ಅದು ತುಸು ಬಿಸಿಯಾಗಿದ್ದೇ ಅದಕ್ಕೆ ಎಳ್ಳು, ಉದ್ದಿನಬೇಳೆ, ಕಡಲೇಬೇಳೆ, ಶೇಂಗಾ, ಕರಿಬೇವು, ಮೆಣಸು, ಇಂಗು ಎಲ್ಲಾ ಹಾಕಿ ಚೆನ್ನಾಗಿ ಹುರಿದುಕೊಳ್ಳಿ.
*ಇದಕ್ಕೆ ಹೆಚ್ಚಿಟ್ಟುಕೊಂಡಿರುವ ಟೊಮೇಟೋವನ್ನು ಹಾಕಿ, ಉಪ್ಪು+ಹುಳಿಯ ಜೊತೆಗೆ ಚೆನ್ನಾಗಿ ಫ್ರೈ ಮಾಡಿಕೊಳ್ಳಿ.
*ಈ ಮಿಶ್ರಣ ತಣಿದ ನಂತರ ರುಬ್ಬಿಕೊಂಡು ಇದಕ್ಕೆ ಒಂದು ಅಥವಾ ಅರ್ಧ ಚಮಚ ಎಣ್ಣೆಯಲ್ಲಿ ಸಾಸಿವೆ, ಕಾಲು ಚಮಚ ಉದ್ದಿನಬೇಳೆ, ಒಂದೆರಡು ಎಸಳು ಕರಿಬೇವಿನಿಂದ ಒಗ್ಗರಣೆ ಹಾಕಿ. (ಕರಿಬೇವು ಕಡಿಮೆ ಇದ್ದರೆ ತುಸುವೇ ಬಳಸಬಹುದು. ಕಡಲೆ, ಉದ್ದಿನಬೇಳೆ, ಶೇಂಗಾ – ಇವೆಲ್ಲಾ ಹಾಕುವುದರಿಂದ ತೆಂಗಿನಕಾಯಿ ಕಾಕಬೇಕೆಂದಿಲ್ಲ. ಬಹಳ ರುಚಿಯಾಗಿರುತ್ತದೆ. ಬೇಕಿದ್ದಲ್ಲಿ ಮರುದಿವಸವೂ ಫ್ರಿಜ್ಜಿಂದ ತೆಗೆದು ತುಸು ಬಿಸಿಮಾಡಿ ಬಳಸಬಹುದು.)

ವಿಧಾನ ೨ : ಇದು ಮೊದಲಿನದ್ದಕ್ಕಿಂತ ಮತ್ತೂ ಸುಲಭ ಹಾಗೂ ಸರಳ.

ಬೇಕಾಗುವ ಸಾಮಗ್ರಿಗಳು :
೧. ಟೊಮೇಟೋ – ೪-೫
೨. ತೆಂಗಿನೆಣ್ಣೆ – ೩-೪ ಚಮಚ
೩. ಈರುಳ್ಳಿ – ಸಾಧಾರಣ ಗಾತ್ರದ್ದು ಒಂದು
೪. ಹಸಿಮೆಣಸು/ಕೆಂಪುಮೆಣಸು – ಖಾರಕ್ಕೆ ತಕ್ಕಷ್ಟು
೫. ಪುಟಾಣಿ ಬೇಳೆ – ಎರಡು ಮುಷ್ಟಿ
೬. ಉಪ್ಪು, ಹುಳಿ ಮತ್ತು ಇಂಗು
೭. ಒಗ್ಗರಣೆಗೆ : ಸಾಸಿವೆ, ಕರಿಬೇವು ಹಾಗೂ ಒಂದು ಒಣಮೆಸಿನ ಚೂರು

ಮಾಡುವ ವಿಧಾನ
*ಬಾಣಲೆಗೆ ಸ್ವಲ್ಪ ಎಣ್ಣೆ ಹಾಕಿ ಮೊದಲು ಹೆಚ್ಚಿಟ್ಟುಕೊಂಡಿರುವ ಟೊಮೇಟೊವನ್ನು ಚೆನ್ನಾಗಿ ಹುರಿದು ತೆಗೆದಿಟ್ಟುಕೊಳ್ಳಿ. ಅದೇ ಬಾಣಲೆಗೆ (ಎಣ್ಣೆ ಇದ್ದಿರುತ್ತದೆ ಮೊದಲೇ ಹಾಕಿದ್ದು.. ಬೇಕಿದ್ದಲ್ಲಿ ಮತ್ತೆ ಸ್ವಲ್ಪ ಹಾಕಿಕೊಳ್ಳಿ) ಹೆಚ್ಚಿಟ್ಟುಕೊಂಡಿರುವ ಈರುಳ್ಳಿಹಾಕಿ ಫ್ರೈ ಮಾಡಿ ತೆಗೆದಿಟ್ಟುಕೊಳ್ಳಿ.
*ಅದೇ ಬಾಣಲೆಯಲ್ಲಿ ಇರುವ ಎಣ್ಣೆ ಪಸೆಯಲ್ಲೇ ಮೆಣಸನ್ನು ಹುರಿದಿಟ್ಟುಕೊಳ್ಳಿ.
*ಈಗ ಮೇಲೆ ಹೇಳಿರುವಂತೇ ಹುರಿದಿಟ್ಟುಕೊಂಡ ಎಲ್ಲಾ ಮಿಶ್ರಣಕ್ಕೆ (ತುಸು ತಣಿದ ನಂತರ) ಪುಟಾಣಿಬೇಳೆ, ಉಪ್ಪು, ಹುಳಿ, ಚಿಟಿಕೆ ಇಂಗು ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ.
*ಈ ಮಿಶ್ರಣಕ್ಕೆ ಸಾಸಿವೆ, ಕರಿಬೇವು ಹಾಗೂ ಒಣಮೆಣಸಿನ ಚೂರುಹಾಕಿ ಒಗ್ಗರಿಸಿ.
ಇದನ್ನೂ ಮಾಡಿನೋಡಿ.. ಸವಿದು ಹೇಳಿ.

ಬದುಕಿಗಾಗಿ ತಿನ್ನುವತ್ತ ನಮ್ಮ ನೋಟ ಸಾಗಲಿ. ರುಚಿಕರ, ಆರೋಗ್ಯಕರ, ಸುಲಭ, ಸರಳ ಆಹಾರದ ಶೈಲಿಯಿಂದ ಸ್ವಸ್ಥರಾಗುತ್ತಾ ಸಾಗೋಣ.

#ಆರೋಗ್ಯವೇ_ಭಾಗ್ಯ
#ಲಾಕ್ಡೌನ್_ಕಾಲದ_ರೆಸಿಪಿಗಳು
#ಅಮ್ಮನ_ಅಡುಗೆ

~ತೇಜಸ್ವಿನಿ ಹೆಗಡೆ

Thursday, November 08, 2018

ಗೋವೆಕಾಯಿ ಕಡುಬು

ಕೃಪೆ: ಅಂತರ್ಜಾಲ

ಗೋವೆಕಾಯಿಗೆ ಚೀನಿಕಾಯಿ, ಸಿಹಿಗುಂಬಳ ಕಾಯಿ ಎಂಬಿತ್ಯಾದಿ ಹೆಸರುಗಳಿವೆ. ಗೋವೆಕಾಯಿಯಲ್ಲಿ ವಿಟಮಿನ್ ಎ ಬಹಳ ಹೆಚ್ಚಿರುತ್ತದೆ. ಅಲ್ಲದೇ, ಇದರೊಳಗಿರುವ ಪೊಟಾಶಿಯಮ್ ಮತ್ತು ಬೀಟಾ ಕೆರೋಟಿನ್ ಕಣ್ಣಿಗೆ, ಹೃದಯಕ್ಕೆ, ರಕ್ತದೊತ್ತಡಕ್ಕೆ, ಚರ್ಮದ ಹೊಳಪಿಗೆ ಹೀಗೆ ಗೋವೆಕಾಯಿ ಬಹು ಉಪಯೋಗಿಯಾಗಿದೆ. ದೀಪಾವಳಿಯ ದಿವಸ ಬಹುತೇಕ ಹವ್ಯಕರ ಮನೆಗಳಲ್ಲಿ ಇದರದ್ದೇ ಕಡುಬನ್ನು ಸಿಹಿ ತಿಂಡಿಯಾಗಿ ಮಾಡುತ್ತಾರೆ. ಇದನ್ನು ತಯಾರಿಸಲು ಬೇಕಾಗುವ ವಸ್ತುಗಳು ಬಹಳ ಕಡಿಮೆ. ಆದರೆ ಮಾಡುವ ಹದ ಚೆನ್ನಾಗಿ ಗೊತ್ತಿರಬೇಕಾಗುತ್ತದೆ. ಗೋವೆಕಾಯಿಯ ಕಡುಬಿಗೆ ಹಸುವಿನ ತುಪ್ಪ ಹಾಕಿ ತಿಂದರೆ ವಾಯು ಸಮಸ್ಯೆ ಆಗದು, ಹೊಟ್ಟೆಗೂ ತಂಪು, ಜೀರ್ಣವಾಗುವುದು ಸುಲಭವಾಗಿ. ಅಲ್ಲದೇ ಮೊಸರಿನ ಜೊತೆಗೂ ಸವಿಯಬಹುದು.. ಇದರ ಮಜವೇ ಬೇರೆ. ಸಿಹಿ ಪ್ರಿಯರು ಇದಕ್ಕೆ ಜೇನುತುಪ್ಪ, ತುಪ್ಪ, ಸಕ್ಕರೆ, ಬೆಲ್ಲ ಎಲ್ಲವನ್ನೂ ಸುರಿದುಕೊಂಡು ತಿನ್ನುವುದೂ ಇದೆ. ಈಗ ಇದನ್ನು ತಯಾರಿಸುವ ವಿಧಾನವನ್ನು ನೋಡೋಣ. ನೀವೂ ಸಿಹಿಗಡುಬನ್ನು ತಯಾರಿಸಿಕೊಂಡು ಮೆದ್ದು ಹೇಗಾಗುವುದು ಎಂಬುದನ್ನೂ ಪ್ರತಿಕ್ರಿಯೆಯಲ್ಲಿ ತಿಳಿಸಿರಿ


**********************
ಗೋವೆಕಾಯಿ ಕಡುಬು
ಬೇಕಾಗುವ ಸಾಮಗ್ರಿಗಳು
(ಸಾಧಾರಣ ದೊಡ್ಡ ಗಾತ್ರದ ಐದು ಕಡುಬಿನ ಪ್ರಮಾಣಕ್ಕೆ)
·        ಅಕ್ಕಿ – ೧ ಲೋಟ
·        ಚೀನಿಕಾಯಿ ಅಥವಾ ಗೋವೆಕಾಯಿ ಹೋಳುಗಳು – ಎರಡೂವರೆ ಲೋಟ
·        ಬೆಲ್ಲ – ಊರಿನ ಹದಾ ಗಟ್ಟಿ ಬೆಲ್ಲವಾದರೆ ಒಂದೂಕಾಲು ಲೋಟ. ಅಂಗಡಿಯ ಅಚ್ಚುಬೆಲ್ಲವಾದರೆ, ಅದನ್ನು ಕುಟ್ಟಿ ಪುಡಿಮಾಡಿಕೊಂಡು ಒಂದೂವರೆ ಲೋಟ ಹಾಕಬೇಕು.
·        ಕಾಯಿ ತುರಿ – ೧/೨ ಭಾಗ
·        ಏಲಕ್ಕಿ – ಪರಿಮಳಕ್ಕೆ ತಕ್ಕಂತೆ
·        ಬಾಳೆ ಎಲೆಗಳು – ಉದ್ದ ಗಾತ್ರ ಬಾಳೆಯೆಲೆ ೩ (ಒಂದು ಬಾಳೆಯೆಲೆಯಲ್ಲಿ ಎರಡು ಕಡುಬನ್ನು ಹಚ್ಚಬಹುದು ಇಲ್ಲಾ ಅದನ್ನು ತುಂಡು ಮಾಡಿಕೊಂಡು ಬೇರೆಬೇರೆಯಾಗೂ ಹಚ್ಚಬಹುದು.)

ಮಾಡುವ ವಿಧಾನ
೧. ಮೊದಲು ಅಕ್ಕಿಯನ್ನು ೪ ಗಂಟೆ ನೆನೆಹಾಕಬೇಕು.
೨. ನೆನೆದ ಅಕ್ಕಿಯನ್ನು ಮಂದವಾಗಿ ಅಂದರೆ ಜಾಸ್ತಿ ನೀರು ಹಾಕದೆ ಗಟ್ಟಿಯಾಗಿ ಮತ್ತು ನುಣ್ಣಗೆ ಕಡೆದಿಟ್ಟುಕೊಳ್ಳಬೇಕು. ಅಕ್ಕಿಯನ್ನು ಕಡೆಯುವಾಗಲೇ ಏಲಕ್ಕಿಯನ್ನೂ ಅದಕ್ಕೇ ಹಾಕಿಬಿಡುವುದು.
೩. ಗೋವೆಕಾಯಿಯನ್ನು ಸಿಪ್ಪೆ ತೆಗೆದು ಚಿಕ್ಕದಾಗಿ ಹೆಚ್ಚಿಟ್ಟುಕೊಳ್ಳುವುದು.
೪. ಬೆಲ್ಲವನು ದಪ್ಪ ತಳದ ಪಾತ್ರೆಗೆ ಹಾಕಿ ಕುದಿಸುವುದು.
೫. ಬೆಲ್ಲ ಕುದಿ ಬರುತ್ತಿರುವಂತೇ, ಅದಕ್ಕೆ ಹೆಚ್ಚಿಟ್ಟುಕೊಂಡಿರುವ ಗೋವೆಕಾಯಿಯ ಹೋಳು ಮತ್ತು ಅರ್ಧಗಡಿ ತೆಂಗಿನ ಕಾಯಿ ತುರಿಯನ್ನು ಹಾಕಿ ಹತ್ತು ನಿಮಿಷ ಕುದಿಸುವುದು.
೬. ಈ ಮಿಶ್ರಣಕ್ಕೀಗ ಬೀಸಿಟ್ಟುಕೊಂಡಿರುವ ಗಟ್ಟಿ ಅಕ್ಕಿ ಹಿಟ್ಟನ್ನು ಒಂದು ಕೈಯಿಂದ ಹಾಕುತ್ತಾ ಮತ್ತೊಂದು ಕೈಯಲ್ಲಿ ತೊಳೆಸುತ್ತಲೇ ಇರಬೇಕು. ಪೂರ್ತಿ ಅಕ್ಕಿಹಿಟ್ಟನ್ನು ಹಾಕಿ ಕೊಂಡು ಆಮೇಲೆ ಅದನ್ನು ತೊಳೆಸಲು ಹೋದರೆ ಅದು ಗಟ್ಟಿಯಾಗಿಬಿಡುವುದು. ಮೊದಮೊದಲು ಇದು ಕಷ್ಟವಾದರೆ, ಸಹಾಯಕ್ಕೊಬ್ಬರು ಬಳಿ ಇದ್ದರೆ, ಒಬ್ಬರು ಹಿಟ್ಟನ್ನು ಸುರಿಯುತ್ತಾ ಹೋದರೆ ಮತ್ತೊಬ್ಬರು ಬಿಡದೇ ತೊಳೆಸುತ್ತಾ ಹೋಗುವುದು ಒಳ್ಳೆಯದು. ಹೀಗೆ ತೊಳೆಸುತ್ತಾ ಹೋದಂತೆ ಮಿಶ್ರಣ ಮಣ್ಣಿಯ ಹದಕ್ಕೆ ಬಂದು ಮುದ್ದೆಯಾಗುವುದು. ಆಗ ಒಲೆಯನ್ನಾರಿಸಿಬಿಡುವುದು.
೭. ಬಾಳೆ ಎಲೆಗಳನ್ನು ಒಲೆಯಲ್ಲಿ ತುಸು ಬಾಡಿಸಿಟ್ಟುಕೊಳ್ಳುವುದು.
೮. ತುಸು ತಣಿದ ಮೇಲೆ ಮುದ್ದೆಯನ್ನು ಕೈಯಲ್ಲಿ ತೆಗೆದುಕೊಂಡು ತುಸು ಬಾಡಿಸಿಟ್ಟುಕೊಂಡಿರುವ ಬಾಳೆ ಎಲೆಯ ಮೇಲೆ ಬೇಕಾದ ಆಕಾರಕ್ಕೆ ಹಚ್ಚಿ, ಅದನ್ನು ನಾಲ್ಕೂ ಬದಿಯಿಂದ ಮಡಚುವುದು.
೯. ಇದನ್ನು ಇಡ್ಳಿ ದಳ್ಳೆಯಲ್ಲಿಟ್ಟು ಬೇಯಿಸುವುದು. ಇದು ಬೇಯಲು ಸುಮಾರು ಒಂದು ತಾಸು ಬೇಕಾಗುವುದು.
೧೦. ಹದವಾಗಿ ಬೆಂದ ಬೆಲ್ಲದ ಗೋವೆಕಾಯಿ ಸಿಹಿಗಡುಬನ್ನು ತುಪ್ಪದ ಜೊತೆಗೆ ಅಥವಾ ಮೊಸರಿನ ಜೊತೆಗೆ ಮೆಲ್ಲಬಹುದು. ಕೆಲವರು ಇದಕ್ಕೆ ಜೇನುತುಪ್ಪ, ಬೆಲ್ಲ, ತುಪ್ಪ ಎಲ್ಲವನ್ನೂ ಹಾಕಿಕೊಂಡು ತಿನ್ನುವುದೂ ಇದೆ.

ರೆಸಿಪಿ ಕೃಪೆ : ನನ್ನ ಅಮ್ಮ ಶ್ರೀಮತಿ ಜಯಲಕ್ಷ್ಮೀ ಭಟ್

~ತೇಜಸ್ವಿನಿ ಹೆಗಡೆ

Friday, August 31, 2018

ನುಗ್ಗೆ ಸೊಪ್ಪಿನ ತಂಬುಳಿ



ನಮ್ಮ ಸುತ್ತ ಮುತ್ತಲು ಬೆಳೆಯುವ, ನಾವು ಮನೆಯಲ್ಲೇ ಬೆಳೆಸಬಹುದಾದ ಅನೇಕ ಸೊಪ್ಪುಗಳು ಆರೋಗ್ಯಕ್ಕೆ ಬಹಳ ಒಳ್ಳೆಯದಾಗಿರುತ್ತವೆ ಮತ್ತು ಅವುಗಳ ಪದಾರ್ಥಗಳನ್ನೂ ತಿನ್ನಲೂ ರುಚಿಕರವಾಗಿರುವುದು.

ನುಗ್ಗೆ ಸೊಪ್ಪು ಎಲ್ಲೆಡೆ ಸರ್ವೇಸಾಮಾನ್ಯವಾಗಿ ಸಿಗುವಂಥ ಬಹೋಪಯೋಗಿ ಸೊಪ್ಪು. ಹಲವು ವಿಟಮಿನ್ನುಗಳ ಆಗರವಿದು. ನರ ದೌರ್ಬಲ್ಯಕ್ಕೆ, ರಕ್ತ ಹೀನತೆಗೆ, ರಕ್ತ ಶುದ್ಧಿಗೆ, ಹಾಲೂಡಿಸುವ ತಾಯಂದಿರಿಗೆ, ಮಲಬದ್ಧತೆಗೆ, ಅಧಿಕ ರಕ್ತದೊತ್ತಡದ ನಿವಾರಣೆಗೆ ಹೀಗೆ ಹಲವು ರೀತಿಯ ದೈಹಿಕ ಸಮಸ್ಯೆಗಳಿಗೆ ರಾಮಬಾಣ ಈ ಸೊಪ್ಪು. ಇದರ ತಂಬುಳಿ, ಚಟ್ನೆ, ಸಾಂಬಾರು, ಪಲ್ಯ, ಬಜೆ ಎಲ್ಲವೂ ತಿನ್ನಲು ಚೆನ್ನಾಗಿರುತ್ತವೆ. ಪ್ರಸ್ತುತ ನಾನು ಇದರ ತಂಬುಳಿ ತಯಾರಿಸುವ ವಿಧಾನವನ್ನು ವಿವರಿಸುತ್ತಿದ್ದೇನೆ. ಸಾಂಬಾರಿನೊಳಗಿರುವ ಸೊಪ್ಪು ಹೆಚ್ಚು ಬೆಂದುಬಿಟ್ಟಿರುತ್ತದೆ ಮತ್ತು ನಾವು ಹೆಚ್ಚೆಂದರೆ ಒಂದೆರಡು ಸೌಟು ಸೇವಿಸಬಹುದೇನೋ. ಆದರೆ ತಂಬುಳಿಯಲ್ಲಿ ಇದರ ಅಂಶಯ ಬಹಳ ಅಧಿಕವಾಗಿರುತ್ತದೆ. ಅನ್ನದ ಜೊತೆ ಕಲಸಿ ತಿಂದರೂ ರುಚಿ, ಹಾಗೇ ಕುಡಿದರೂ ಚೆನ್ನಾಗಿರುತ್ತದೆ. ತಯಾರಿಸುವ ವಿಧಾನವೂ ಬಹಳ ಸುಲಭ ಹಾಗೂ ಸರಳ.

ಬೇಕಾಗುವ ಸಾಮಗ್ರಿಗಳು (ಮೂರ್ನಾಲ್ಕು ಜನರ ಅಳತೆಯಲ್ಲಿ)
೧. ನುಗ್ಗೆ ಸೊಪ್ಪು (ನಾಲ್ಕು ದೊಡ್ಡ ಮುಷ್ಟಿಯಷ್ಟು)
೨. ಬಿಳೇ ಎಳ್ಳು – ೧ ಚಮಚ
೩. ಜೀರಿಗೆ – ೧ ಚಮಚ
೪. ಕಾಳು ಮೆಣಸು – ೪-೫ ಕಾಳುಗಳು
೫. ಇಂಗು – ಚಿಟಿಕೆಯಷ್ಟು
೬. ತೆಂಗಿನೆಣ್ಣೆ (ಅಥವಾ ತುಪ್ಪವನ್ನೂ ಬಳಸಬಹುದು) – ೧-೨ ಚಮಚ (ಹುರಿಯಲು ಬೇಕಾಗುವಷ್ಟು ಮಾತ್ರ)
೭. ಕಡೆದ ಮಜ್ಜಿಗೆ – ೨ ದೊಡ್ಡ ಲೋಟ
೮. ತೆಂಗಿನ ತುರಿ – ಒಂದು ಮುಷ್ಟಿಯಷ್ಟು (ಬೀಸಲು ಬೇಕಾಗುವಷ್ಟು ಮಾತ್ರ)
೯. ಉಪ್ಪು – ರುಚಿಗೆ ತಕ್ಕಷ್ಟು

ತಯಾರಿಸುವ ವಿಧಾನ
*ಕಾದ ಎಣ್ಣೆಗೆ ಬಿಳೇ ಎಳ್ಳು, ಜೀರಿಗೆ, ಇಂಗು ಮತ್ತು ಕಾಳುಮೆಣಸುಗಳನ್ನು ಹಾಕಿ ಒಗ್ಗರಿಸಿಕೊಳ್ಳಿ.
*ಅವುಗಳು ಹುರಿದು ಚಟಗುಡುವಾಗ, ಮೊದಲೇ ತೊಳೆದಿಟ್ಟುಕೊಂಡಿರುವ ಸೊಪ್ಪನ್ನು ಹಿಂಡಿ ಈ ಒಗ್ಗರಣೆಗೆ ಹಾಕಿ ಚೆನ್ನಾಗಿ ಹುರಿಯಿರಿ (ಅದು ಬಾಡುವಷ್ಟು ಹೊತ್ತು).
*ಮಿಶ್ರಣ ಚೆನ್ನಾಗಿ ಹುರಿದು ಸೊಪ್ಪು ಬಾಡಿದ ನಂತರ, ತುಸು ತಣಿಯಲು ಬಿಟ್ಟು, ಕಾಯಿತುರಿಯೊಂದಿಗೆ ನುಣ್ಣಗೆ ಬೀಸಿಕೊಳ್ಳಿ.
*ನಿಮಗೆ ತಂಬುಳಿ ಕುಡಿಯಲು ಬೇಕಾಗುವಷ್ಟು ತೆಳ್ಳಗಿರಬೇಕೆಂದರೆ ಬೀಸಿದ ಮಿಶ್ರಣೆಗೆ ಮಜ್ಜಿಗೆಯ ಜೊತೆ ೧-೨ ಲೋಟ ನೀರನ್ನು ಸೇರಿಸಿಕೊಂಡು ಅದಕ್ಕೆ ಸ್ವಲ್ಪ ಉಪ್ಪು ಹಾಕಿ ಕುಡಿಯಬಹುದು. ಇಲ್ಲಾ, ಬೀಸಿದ ಮಿಶ್ರಣಕ್ಕೆ ಮಜ್ಜಿಗೆ, ಒಂದು ಲೋಟ ನೀರು ಮತ್ತು ಉಪ್ಪು ಸೇರಿಸಿ ಹದಾ ಮಂದವಾಗಿಸಿಕೊಂಡು ಅನ್ನಕ್ಕೆ ಕಲಸಿಯೂ ತಿನ್ನಬಹುದು ಅಥವಾ ಹಾಗೇ ಕುಡಿಯಲೂಬಹುದು.
ಬಹಳ ರುಚಿಕರವಾಗಿರುವುದಂತೂ ಸತ್ಯ! ಮಾಡಿ ನೋಡಿ ಒಮ್ಮೆ.

~ತೇಜಸ್ವಿನಿ ಹೆಗಡೆ.

Saturday, February 24, 2018

ಚೀನಿಕಾಯಿ (ಸಿಹಿ ಕುಂಬಳಕಾಯಿ) ಕೊದ್ದೆಲು

Sweet Pumpkin ಅನ್ನು ನಾವು ಚೀನಿಕಾಯಿ ಎಂದು ಕರೆಯುತ್ತೇವೆ. ಇದಕ್ಕೆ ಸಿಹಿ ಕುಂಬಳ ಎಂದೂ ಹೇಳುತ್ತಾರೆ. ಮಲೆನಾಡಿನಲ್ಲಿ ದೀಪಾವಳಿಯ ದಿವಸ ಇದರ ಕಡುಬು ಮಾಡದ ಮನೆಯೇ ಇಲ್ಲ ಎನ್ನಬಹುದು. ನೋಡಲು ಕಿತ್ತಳೆ/ಕಡು ಹಸಿರು ಬಣ್ಣದಿಂದ ಕೂಡಿರುವ ಈ ಕಾಯಿ ನೋಡಲೆಷ್ಟು ಸುಂದರವೋ ಅಷ್ಟೇ ಆರೋಗ್ಯಕ್ಕೂ ಹಿತಕರ. ಇದರೊಳಗಿರುವ ಪೊಟಾಶಿಯಮ್ ಮತ್ತು ಬೀಟಾ ಕೆರೋಟಿನ್ ಕಣ್ಣಿಗೆ, ಹೃದಯಕ್ಕೆ, ರಕ್ತದೊತ್ತಡಕ್ಕೆ ಚರ್ಮದ ಹೊಳಪಿಗೆ ಹೀಗೆ ಹಲವು ರೀತಿಯಲ್ಲಿ ಇದು ಬಹಳ ಉಪಯೋಗಿ ಎಂದು ಹೇಳುತ್ತಾರೆ.  



ಬೇಕಾಗುವ ಸಾಮಗ್ರಿಗಳು (೪-೫ ಜನರ ಅಳತೆಯಲ್ಲಿ)

* ಚೀನಿಕಾಯಿ – ಸಣ್ಣ ಗಾತ್ರದ್ದಾರೆ ಪೂರ್ತಿ ಬೇಕು, ದೊಡ್ಡದಾದರೆ ಅರ್ಧ ಸಾಕು.
* ಕೆಂಪು ಮೆಣಸು ಖಾರಕ್ಕೆ ತಕ್ಕಂತೆ
* ಮೆಂತೆ 1 1/2 ಚಮಚ
* ಉದ್ದಿನ ಬೇಳೆ – 2 ಚಮಚ
* ಕೊತ್ತಂಬರಿ  - 2 ಚಮಚ
* ಜೀರಿಗೆ – 1/4 ಚಮಚ
* ಕರಿಬೇವು – 15-20 ಎಲೆಗಳು
* ಎಣ್ಣೆ – ಹುರಿಯಲು ಬೇಕಾಗುವಷ್ಟು
* ಕಾಯಿ ತುರಿ – ಅರ್ಧ ಕಡಿ (ಚಿಕ್ಕ ಕಾಯಿಯಾಯದರೆ ಪೂರ್ತಿ ಹಾಕಿ) 
* ಬೆಲ್ಲ, ಉಪ್ಪು, ಹುಳಿ – ರುಚಿಗೆ ತಕ್ಕಷ್ಟು
* ಒಗ್ಗರಣೆಗೆ ಸಾಸಿವೆ ಹಾಗೂ ಒಂದೆರಡು ಎಸಳು ಕರಿಬೇವು.

**ಗಮನಿಸಿ: ಇಲ್ಲಿ ಚಮಚ ಎಂದರೆ ದೊಡ್ಡ ಗಾತ್ರದಲ್ಲಿ... ಟೇಬಲ್ ಸ್ಪೂನ್. ದೊಡ್ಡ ಚಮದಲ್ಲಿ ಮೆಂತೆ ತೆಗೆದುಕೊಂಡರೆ ತುಸು ಕಹಿ ಬರಬಹುದು.

ತಯಾರಿಸುವ ವಿಧಾನ

~ ಮೊದಲು ಚೀನಿಕಾಯನ್ನು ಹೋಳು ಮಾಡಿಕೊಂಡು ಅದಕ್ಕೆ ಉಪ್ಪು+ಬೆಲ್ಲ+ಹುಳಿ ಹಾಕಿ ಹದವಾಗಿ ಬೇಯಿಸಿಕೊಳ್ಳಿ. ಒಂದೊಮ್ಮೆ ಇಲ್ಲಿ ಹುಳಿ, ಬೆಲ್ಲ ಮರೆತು ಹೋದರೂ ಬೀಸುವಾಗ ಅಥವಾ ಗೊಡಗುಡಿಸುವಾಗ ಹಾಕಿಕೊಳ್ಳಬಹುದು. ಚೀನಿಕಾಯಿ ಸಿಹಿಯೇ ಇರುವುದರಿಂದ ಬೆಲ್ಲ ಜಾಸ್ತಿ ಹಾಕಬೇಕೆಂದಿಲ್ಲ. ರುಚಿಗೆ ತಕ್ಕಷ್ಟು ಸಾಕಾಗುತ್ತದೆ.
~  ಕೆಂಪು ಮೆಣಸು + ಮೆಂತೆ + ಕೊತ್ತಂಬರಿ ಬೀಜ + ಜೀರಿಗೆ + ಉದ್ದಿನ ಬೇಳೆ + ಕರಿಬೇವಿನ ಎಲೆಗಳು ಇವೆಲ್ಲವನ್ನೂ ಎಣ್ಣೆಯೊಂದಿಗೆ ಹುರಿದುಕೊಳ್ಳಿ.
~ ಹುರಿದ ಮಿಶ್ರಣಕ್ಕೆ ಕಾಯಿತುರಿಗಳನ್ನು ಹಾಕಿ ತರಿತರಿಯಾಗಿ ಬೀಸಿಕೊಳ್ಳಿ (ತುಂಬಾ ನುಣ್ಣಗಾಗದಿದ್ದರೆ ಒಳ್ಳೆಯದು)
~ ಬೀಸಿದ ಮಿಶ್ರಣವನ್ನು ಬೇಯಿಸಿದ ಹೋಳಿಗೆ ಹಾಕಿ, ಉಪ್ಪು+ಹುಳಿ+ಸಿಹಿಯನ್ನು ಹದಮಾಡಿಕೊಂಡು ಚೆನ್ನಾಗಿ ಕುದಿಸಿ. ಇದು ಮಂದವಾಗಿರಬೇಕು. ಕುದಿಸುವಾಗ ಜಾಸ್ತಿ ನೀರು ಹಾಕಬಾರದು.
~ ಗೊಡಗುಡಿಸಿದ ನಂತರ ಸಾಸಿವೆ+ಒಂದೆರಡು ಎಸಳು ಕರಿಬೇವಿನ ಒಗ್ಗರಣೆ ಹಾಕಿ ಮುಚ್ಚಿಬಿಡಿ.

ಬಿಸಿ ಬಿಸಿ ಕೊದ್ದೆಲನ್ನು ಸವಿದ ಮೇಲೆ ಬೇಳೆ ಹಾಕಿದ ಸಾಂಬರ್ ತುಸು ಸಮಯ ಬೇಡವೇ ಬೇಡವೆಂದೆನಿಸಿಬಿಡುವುದಂತೂ ಖಾತ್ರಿ! ಹೆಚ್ಚಾಗಿ ಕುಚ್ಚಲಕ್ಕಿ (ಬಾಯ್ಲ್ಡ್ ರೈಸ್)ಯ ಜೊತೆಗೆ ಇದರ ಸವಿ ಇನ್ನೂ ಹೆಚ್ಚು ಅನ್ನುತ್ತಾರೆ ಹಲವರು. ಆದರೆ ವೈಟ್ ರೈಸ್ ಆದರೂ ಸೇವಿಸಲು ಬಹಳ ರುಚಿಯಾಗಿರುತ್ತದೆ.

ಸೂಚನೆ :-

ಇದೇ ರೀತಿ ಬಸಳೆ, ಬಣ್ಣದ ಸವತೆ, ಬಟಾಟೆ, ಬದನೆಕಾಯಿ – ಈ ತರಕಾರಿಗಳ ಕೊದ್ದೆಲನ್ನೂ ತಯಾರಿಸಬಹುದು. ಬಸಳೆ ಕೊದ್ದಲು ಮಾಡುವುದಾದರೆ ಮೆಂತೆಯ ಪ್ರಮಾಣ ಕಡಿಮೆ ಮಾಡಿ, ಸಾಸಿವೆಯನ್ನು ಒಂದೂವರೆ ಚಮಚ ಹಾಕಬೇಕು. ಹಾಗೇಯೇ ಬಟಾಟೆಯಂಥ ಗೆಡ್ಡೆಗೆಣಸಿನ ಕೊದ್ದೆಲು ತಯಾರಿಸುವಾಗ ಇಂಗನ್ನು ಹಾಕಬೇಕು. 

~ತೇಜಸ್ವಿನಿ ಹೆಗಡೆ

Wednesday, February 15, 2017

ಕಡಲೇ ಹಿಟ್ಟು ಮತ್ತು ಬೆಲ್ಲದ ಲಡ್ಡು

ಸಕ್ಕರೆ ಬಾಯಿಗೆ ಸಿಹಿ, ಹೊಟ್ಟೆಗೆ ವಿಷ. ಸಕ್ಕರೆಯನ್ನು ಆದಷ್ಟು ಕಡಿಮೆ ತಿನ್ನಿ.. ತಿನ್ನದೇ ಇದ್ದರೂ ನಷ್ಟವೇನಿಲ್ಲ ಎಂದೇ ಹೇಳುತ್ತಾರೆ ವೈದ್ಯರು. ಆದರೆ ಬಹುತೇಕ ಸಿಹಿ ತಿಂಡಿಗಳಿಗೆ ಸಕ್ಕರೆಯನ್ನು ಹಾಕೇ ಹಾಕುತ್ತೇವೆ. ಅದರ ಬದಲು ಬೆಲ್ಲವನ್ನು ಉಪಯೋಗಿಸಿ ಮಾಡಿದರೆ ಬಾಯಿಗೂ ರುಚಿ, ದೇಹಕ್ಕೂ ಹಿತ. ಕಡಲೇ ಹಿಟ್ಟಿನ ಲಾಡನ್ನು ಸಕ್ಕರೆ ಪಾಕದಲ್ಲಿ ಮಾಡುವುದು ಸರ್ವೇ ಸಾಮಾನ್ಯ. ಆದರೆ ಬೆಲ್ಲವನ್ನು ಬಳಸಿ ಮಾಡಿದರೂ ಬಹು ರುಚಿಯಾಗಿರುತ್ತದೆ.

ಬೇಕಾಗುವ ಸಾಮಗ್ರಿಗಳು. (ಸಾಧಾರಣ ಗಾತ್ರದ ೧೫ ಲಾಡಿಗೆ)

೧. ಕಡಲೇಹಿಟ್ಟು : ೧ ಲೋಟ
೨. ಬೆಲ್ಲ : ೧/೨ ಕಪ್ಪು (ತುಂಬಾ ನೀರಿನಂತಿದ್ದರೆ ತುಸು ಕಡಿಮೆ ಹಾಕಿ.. ನಿಮ್ಮ ಸಿಹಿಗೆ ತಕ್ಕಷ್ಟು)
೩. ಕಾಯಿತುರಿ : ೧/೨ ಕಪ್ಪು
೪. ತುಪ್ಪ - ೪ ಚಮಚ
೫. ಏಲಕ್ಕಿ ಪುಡಿ
೬. ಡ್ರೈಫ್ರುಟ್ಸ್ - ಬಾದಾಮಿ, ಗೋಡಂಬಿ, ಪಿಸ್ತಾ - ೧/೪ ಕಪ್
ಬೇಕಿದ್ದರೆ ಕಡಲೇ ಬೀಜವನ್ನು ಹುರ್ದಿಉ ತರಿ ತರಿಯಾಗಿ ಹುಡಿಮಾಡಿಟ್ಟುಕೊಂಡು, ಡ್ರೈಫ್ರೂಟ್ಸ್ ಬದಲಿಗೆ ಬಳಸಬಹುದು.

ಮಾಡುವ ವಿಧಾನ
೧. ಮೊದಲು ಕಡಲೇ ಹಿಟ್ಟಿಗೆ ತುಪ್ಪ ಬೆರಸಿ ಚೆನ್ನಾಗಿ ಘಮ್ಮೆನ್ನುವ ಪರಿಮಳ ಬರುವವರೆಗೆ, ಹಿಟ್ಟು ತುಸು ಕೆಂಪಾಗುವವರೆಗೆ ಹುರಿಯಬೇಕು. ಹುರಿದ ಮೇಲೆ ಗ್ಯಾಸ್ ಆಫ್ ಮಾಡಿ ಪಕ್ಕದಲ್ಲಿಟ್ಟುಕೊಳ್ಳಿ.

೨. ಬೆಲ್ಲಕ್ಕೆ ಕಾಯಿತುರಿ ಹಾಕಿಕೊಂಡು ಕುದಿಸಿಕೊಳ್ಳಿ. (ಪಾಕವಾಗ ಬೇಕೆಂದಿಲ್ಲ)

೩. ಕುದಿಬಂದ
ಬೆಲ್ಲಕ್ಕೆ ಏಲಕ್ಕಿ ಹುಡಿ, ಡ್ರೈಫ್ರುಟ್ಸ್ ಹುಡಿ/ಕಡಲೇ ಬೀಜದ ಹುಡಿ ಎಲ್ಲವನ್ನೂ ಹಾಕಿ ಚೆನ್ನಾಗಿ ತೊಳಸಿ, ಗ್ಯಾಸ್ ಆಫ್ ಮಾಡಿ.

೪. ಮೇಲಿನ ಮಿಶ್ರಣಕ್ಕೆ ಹುರಿದಿಟ್ಟುಕೊಂಡಿರುವ ಕಡಲೇ ಹಿಟ್ಟಿನ್ನು ಸೇರಿಸಿ ಚೆನ್ನಾಗಿ ತಿರುಗಿಸಿ, ತುಸು ಬಿಸಿ ಇರುವಾಗಲೇ ಉಂಡೆ ಕಟ್ಟಿ.
ಬೇಕಿದ್ದಲ್ಲಿ ತುಪ್ಪ ಸವರಿದ ಬಟ್ಟಲಿಗೆ ಹೊಯ್ದು, ಕೊಯ್ದು ಹಲ್ವದಂತೆಯೂ ತಿನ್ನಬಹುದು.

~ತೇಜಸ್ವಿನಿ ಹೆಗಡೆ.